Pezullime në Polici pas vrasjes në Pejë: Ministri Sveçla njofton për 11 zyrtarë dhe 155 raste me rrezikshmëri të lartë
Ministri i Punëve të Brendshme, Xhelal Sveçla, ka njoftuar pezullimin nga detyra të 11 zyrtarëve policorë në Pejë, si pasojë e hetimeve rreth rastit të vrasjes së Arlinda Zekajt. Deklarata u bë gjatë një konference për mediat, ku Sveçla theksoi se asnjë gradë apo pozitë nuk do të shërbejë si mburojë për të shmangur përgjegjësinë.
Ai shtoi se brenda 72 orëve janë konfirmuar dhe qartësuar dështimet në trajtimin e rastit të viktimës Zekaj. Ministri Sveçla bëri të ditur se tashmë i ka dorëzuar Kryeministrit Albin Kurti një raport të detajuar mbi veprimet e ndërmarra nga Policia e Kosovës dhe Inspektorati Policor në lidhje me këtë ngjarje.
Përveç kësaj, Sveçla informoi se janë identifikuar 155 raste aktive me rrezikshmëri të lartë, për të cilat Policia ka raportuar lidhur me masat e ndërmarra. Ai theksoi rëndësinë e trajtimit me seriozitet të këtyre situatave, duke kujtuar se Arlinda Zekaj kishte kërkuar mbrojtje. “Përgjegjësia jonë është që të sigurohet që çdo veprim apo mosveprim të hetohet,” u shpreh ministri, duke shtuar se të gjitha rastet e identifikuara duhet të trajtohen me vëmendjen e duhur institucionale.
Sipas ministrit, me kërkesë të Kryeministrit Kurti, është përpiluar një raport i veçantë pikërisht për këto raste aktive me rrezikshmëri të lartë. Ai përfundoi duke ritheksuar zotimin se të gjitha këto raste do të trajtohen me seriozitetin më të madh.