Partia Demokratike bojkoton Konferencën e Kryetarëve për Buxhetin 2027: Mungesë dokumentesh dhe shkelje e Rregullores
Grupi Parlamentar i Partisë Demokratike ka njoftuar këtë të enjte se nuk do të marrë pjesë në mbledhjen e Konferencës së Kryetarëve, e cila ishte thirrur për orën 08:30. Arsyeja e bojkotit, sipas PD-së, është mungesa e plotë e dokumentacionit për projektbuxhetin e shtetit për vitin 2027 dhe paketën fiskale, si dhe shkelja e rregullores së Kuvendit për afatin e njoftimit të mbledhjes.
Në këtë mbledhje, ministri i Financave pritej të prezantonte projektligjin për Buxhetin e Shtetit 2027. Megjithatë, Partia Demokratike thekson se deputetëve nuk u është vënë në dispozicion asnjë dokument për këtë nismë të rëndësishme, përfshirë projektligjet, relacionet shpjeguese dhe dokumentacionin financiar. PD vlerëson se kjo situatë i vendos deputetët në pamundësi për të lexuar, studiuar apo analizuar materialet përpara prezantimit, duke e bërë Kuvendin një “sallë konferencash të qeverisë” dhe jo një institucion kontrollues.
Përveç mungesës së dokumenteve, opozita ngre si shqetësim edhe shkeljen e afateve rregullatore. PD bën të ditur se mbledhja është njoftuar vetëm pasditen e djeshme, ndërkohë që Neni 12, pika 3 e Rregullores së Kuvendit përcakton se mbledhjet e Konferencës së Kryetarëve, si rregull, zhvillohen jo më herët se 48 orë nga momenti i njoftimit. Sipas tyre, ky shpërfillje e rregullave është e papranueshme, sidomos kur bëhet fjalë për ligjin financiar më të rëndësishëm të vitit, i cili kërkon transparencë, dokumentacion të plotë dhe debat parlamentar.
Partia Demokratike shprehet se ky veprim ngre dyshime për qëllimin e vërtetë të mbledhjes, duke e konsideruar atë si një “aktivitet propagandistik të qeverisë” në vend të një diskutimi serioz. Opozita kërkon që projektligji për Buxhetin 2027, së bashku me të gjithë dokumentacionin shoqërues, t’u vihet menjëherë në dispozicion deputetëve. Gjithashtu, ajo kërkon që Konferenca e Kryetarëve të thirret duke respektuar Rregulloren dhe të sigurohet një kalendar real shqyrtimi, me kohë të mjaftueshme për analizë, pyetje, diskutime dhe amendamente, duke theksuar se buxheti i përket qytetarëve shqiptarë dhe duhet të jetë transparent për publikun.
Në fund të deklaratës, Partia Demokratike i drejtohet Kryetarit të Kuvendit, duke i kujtuar se detyra e tij është të garantojë të drejtat e të gjithë deputetëve dhe zbatimin e Rregullores së Kuvendit, dhe jo të organizojë axhendën e ministrave. Bojkoti, thekson PD, nuk është refuzim i diskutimit të buxhetit, por refuzim i një procedure që zbraz debatin parlamentar nga përmbajtja, duke argumentuar se qeveria ka të drejtë të propozojë buxhetin, por jo t’i diktojë Parlamentit si duhet ta kontrollojë atë.