Putin lëvdon Elon Musk si “gjeni të vërtetë” dhe konfirmon kontakte për sistemet satelitore
Presidenti rus Vladimir Putin ka vlerësuar biznesmenin amerikan Elon Musk si një “gjeni të vërtetë”, duke zbuluar njëkohësisht se Rusia mban kontakte me të lidhur me rrjetet satelitore. Kjo deklaratë vjen ndërsa Moska po zhvillon sistemin e saj të komunikimit satelitor për përdorim ushtarak në luftën kundër Ukrainës.
Gjatë një samiti me udhëheqës afrikanë në Moskë, Putin theksoi se “Elon Musk është një gjeni, një gjeni i vërtetë”, sipas agjencisë ruse të lajmeve TASS. Ai vazhdoi duke vënë në dukje ndryshimin mes mbi 5,000 satelitëve të Starlink, rrjetit të krijuar nga kompania SpaceX e Musk (numri aktual i të cilëve vlerësohet rreth 10,000), dhe “hapave të parë” të Rusisë me sistemin e saj satelitor, të quajtur Rassvet.
Putin bëri gjithashtu me dije rëndësinë e kontakteve që pala ruse mban me biznesmenin amerikan, duke theksuar se “jemi në kontakt të ngushtë me partnerët tanë amerikanë, përfshirë zotin Musk, sepse është shumë e rëndësishme që të mos krijojmë pengesa për njëri-tjetrin në orbitë dhe të ruajmë një nivel të caktuar disipline dhe rregulli.”
Komentet e Putin vijnë në një kohë kur Starlink, sistemi i internetit satelitor i SpaceX, ka qenë në qendër të vëmendjes për shkak të kufizimeve të vendosura në versionin e tij ushtarak, Starshield, në fillim të tetorit. Këto kufizime u zbatuan papritur, duke penguar Ukrainën në sulmet me dronë me rreze të mesme veprimi dhe duke vështirësuar përdorimin e disa sistemeve të mbrojtjes ajrore.
Fillimisht, Elon Musk mohoi se kishte urdhëruar kufizimet, por në fund të javës së kaluar, ai deklaroi se kishte “mbyllur një boshllëk ligjor” që lejonte përdorimin ushtarak të rrjetit Starlink. Vlen të theksohet se Starlink nuk operon në Rusi, dhe përdorimi i tij nga forcat ruse në Ukrainë ishte ndaluar që në fillim të këtij viti.