Meta arrin marrëveshje me një tjetër adoleshente, tërhiqen akuzat për varësinë nga platformat sociale
Kompania Meta, pronare e platformave gjigante Instagram dhe Facebook, ka arritur një marrëveshje jashtë gjykatës me një tjetër adoleshente, e cila e akuzonte kompaninë se platformat e saj kishin nxitur varësinë dhe kishin ndikuar negativisht në shëndetin e saj mendor, si dhe në zhvillimin e çrregullimeve të të ngrënit.
E reja 18-vjeçare, e identifikuar me inicialet KDB, ka tërhequr akuzat pas kësaj marrëveshjeje, kushtet e së cilës nuk janë bërë publike. Kjo shënon marrëveshjen e dytë të Metës brenda një jave, pas zgjidhjes së një çështjeje të ngjashme me një tjetër paditëse 16-vjeçare.
Si pasojë e këtyre zhvillimeve, procesi gjyqësor që pritet të nisë në Los Angeles do të vijojë tashmë vetëm kundër Snap Inc., kompanisë mëmë të platformës Snapchat. Dy adoleshentet pretendonin se kishin nisur përdorimin e platformave sociale në moshë shumë të vogël dhe se funksione të caktuara, si luajtja automatike e videove dhe lëvizja e pafundme në ekran (infinite scroll), kishin nxitur sjellje kompulsive dhe varësi.
Kompanitë e teknologjisë i kanë mohuar vazhdimisht këto akuza, duke deklaruar se platformat nuk janë krijuar për të shkaktuar varësi dhe se kanë ndërmarrë masa të ndryshme për mbrojtjen e përdoruesve të mitur. Kjo çështje është pjesë e një vale më të gjerë padish në Shtetet e Bashkuara, që adresojnë ndikimin e platformave të mëdha të rrjeteve sociale në shëndetin mendor të të rinjve.