Vlorë: Shpëtohet shtetasi amerikan i humbur me dëmtime në këmbë, ndërhyn Njësia Speciale Delta
Një operacion kërkim-shpëtimi i suksesshëm u finalizua mbrëmjen e sotme në zonën e Bristanit në Vlorë, ku efektivët e Njësisë Speciale Delta arritën të lokalizojnë dhe shpëtojnë një shtetas amerikan. I huaji kishte humbur orientimin dhe kishte pësuar dëmtime në këmbë, duke e bërë të pamundur largimin e tij pa ndihmë.
Ngjarja u raportua rreth orës 18:00, duke vënë menjëherë në lëvizje forcat e specializuara të policisë. Kërkimet nga toka, të ndërmarra nga Njësia Speciale Delta, u zhvilluan në kushte të vështira terreni dhe errësire, duke kërkuar një angazhim maksimal të efektivëve.
Pas rreth tre orësh kërkimesh intensive, shtetasi amerikan u gjet në orën 20:45. Ai u lokalizua falë punës së pandërprerë të ekipit të shpëtimit, i cili iu përgjigj me shpejtësi thirrjes për ndihmë.
Menjëherë pas nxjerrjes së tij nga zona ku ndodhej, shtetasi amerikan u transportua drejt Vlorës për të marrë ndihmën e nevojshme mjekësore. Sipas informacioneve paraprake, gjendja e tij shëndetësore paraqitet e mirë dhe jashtë rrezikut.
