Pedagogu Fitim Zekthi kritikon qasjen politike të Kurtit: Kosova ka nevojë për qeverisje model
I ftuar në emisionin “Now me Erla Mëhillin”, pedagogu Fitim Zekthi ka analizuar situatën aktuale politike në Kosovë, duke u ndalur në mënyrën se si kryeministri Albin Kurti menaxhon proceset politike në vend.
Zekthi e përshkroi stilin e veprimit të Kurtit duke e krahasuar me “shkuljen e timonit të autobusit”. Sipas tij, një qasje e tillë e bën politikën të paparashikueshme dhe nuk përputhet me parimet e një politike të shëndoshë dhe të mirë drejtuese.
Pedagogu theksoi se Kosova, duke qenë një shtet që ende përballet me sfida thelbësore në skenën ndërkombëtare dhe në procesin e konsolidimit të saj, kërkon një qeverisje model. Ai argumentoi se stabiliteti dhe parashikueshmëria janë thelbësore për rrugëtimin e shtetit të ri.
“Albin Kurti përdor një teknikë politike të shkuljes së timonit të autobusit. Unë e shkul këtë dhe i them: ‘O hap rrugën se të rashë, ose bëj diçka’. Unë s’e kontrolloj dot timonin,” shpjegoi Zekthi. Ai shtoi se kjo qasje e paparashikueshme nuk i pëlqen te politikanët, pasi politika e mirë nuk duhet të jetë e tillë.
Duke iu referuar historisë së Kosovës, Zekthi nënvizoi se gjaku i sakrifikuar gjatë luftës duhet t’i shtyjë udhëheqësit politikë të bëjnë një sakrificë të ngjashme sot, duke hequr dorë nga “epshat e pushtetit”. Ai vuri në pah se përgjegjësia e atyre që luftuan duhet të shërbejë si udhërrëfyes për qeverisjen aktuale.
Më tej, Zekthi thelloi argumentin e tij për demokracinë, duke thënë se ajo nuk është thjesht çështje zgjedhjesh, edhe pse këto janë një kusht i domosdoshëm. “Demokracia ka të bëjë me ndarjen e pushteteve, sundimin e së drejtës,” tha ai. Zekthi paralajmëroi se nëse një pushtet ekzekutiv kontrollon prokurorinë, gjykatat dhe nëpërkëmb parlamentin, atëherë kjo nuk mund të quhet më demokraci.