Rusia hedh poshtë raportimet për rastin e dytë të murtajës në Siberi
Rusia ka mohuar me forcë raportimet e mediave për një rast të dytë të dyshuar të murtajës në rajonin e Siberisë, ndërkohë që vazhdojnë thirrjet për transparencë pas vdekjes së një punonjëseje laboratori nga kjo sëmundje javën e kaluar.
Organi mbikëqyrës i shëndetit publik rus, Rospotrebnadzor, ka deklaruar se nuk shikon asnjë rrezik epidemie pas vdekjes së Darya Shipilovës, 28 vjeçe, një punonjëse në Institutin e Kërkimeve Kundër Murtajës në Irkutsk. Shipilova ndërroi jetë javën e kaluar në qytetin Shelekhov, pranë Irkutskut.
Sipas agjencisë, Shipilova ishte vaksinuar dhe zotëronte imunitet ndaj infeksioneve të rrezikshme me të cilat punonte. Më tej, Rospotrebnadzor theksoi se gati 5,000 teste laboratorike nuk kishin zbuluar praninë e patogjenëve të rrezikshëm dhe se mbi 90% e personave që kishin pasur kontakt me të kishin përfunduar monitorimin mjekësor.
Raportimet për një rast të dytë të dyshuar të murtajës në Siberi u hodhën poshtë prerësisht edhe nga Kremlini. Zëdhënësi Dmitry Peskov u tha gazetarëve se shumica dërrmuese e informacioneve të mediave mbi këtë situatë ishin “të rreme” dhe u bëri thirrje qytetarëve t’u besojnë vetëm deklaratave zyrtare të Rospotrebnadzor.
Kjo zhvillim vjen ndërsa autoritetet ruse kishin pohuar që nga fillimi i javës se Darya Shipilova kishte vdekur nga pneumonia dhe se shkaku përfundimtar i vdekjes së saj mbetet “i papërcaktuar”.
Situata ka tërhequr vëmendjen ndërkombëtare. Drejtori i Përgjithshëm i OBSH-së, Tedros Adhanom Ghebreyesus, i bëri thirrje Moskës të mërkurën të sqarojë situatën, veçanërisht në lidhje me raportimet mediatike për një anëtar të dytë të stafit me pneumoni me origjinë të paqartë.