TIA reagon pas problemeve teknike në trafikun ajror: Pezullim i përkohshëm për sigurinë
Aeroporti Ndërkombëtar i Tiranës (TIA) ka reaguar pas disa problemeve teknike të evidentuara në sistemin e monitorimit të trafikut ajror, duke sqaruar se kjo situatë çoi në një pezullim të përkohshëm të fluturimeve në hapësirën ajrore shqiptare. Aeroporti bëri me dije se ndërprerja, e cila zgjati vetëm pak minuta, u krye si masë e domosdoshme sigurie.
Problematika teknike, e shfaqur në sistemin e Albcontrol, shkaktoi vonesa të konsiderueshme në oraret e fluturimeve nga dhe drejt aeroportit të Rinasit. Kjo solli si pasojë grumbullimin e një numri të madh pasagjerësh në terminal, të cilët prisnin informacione mbi nisjet apo mbërritjet e avionëve.
Përmes një njoftimi zyrtar, TIA theksoi se po bashkëpunon ngushtë me të gjitha autoritetet përkatëse dhe kompanitë ajrore për menaxhimin e situatës. Stafi i aeroportit është angazhuar maksimalisht për të rikthyer sa më shpejt operacionet në normalitet dhe për të asistuar pasagjerët e prekur nga vonesat dhe ndryshimet në oraret.
Problemi teknik u adresua menjëherë pas evidentimit, dhe aktualisht puna vijon intensivisht për normalizimin e plotë të trafikut ajror dhe funksionimit të aeroportit. TIA garanton se siguria e pasagjerëve mbetet prioriteti kryesor në çdo moment.
Aeroporti Ndërkombëtar i Tiranës këshillon të gjithë pasagjerët që të kontrollojnë rregullisht njoftimet zyrtare të aeroportit dhe komunikimet e kompanive ajrore me të cilat udhëtojnë, pasi oraret e fluturimeve mund të pësojnë ndryshime.