Friedrich Merz i drejton “ultimatum” CDU-së pas rezultateve negative në zgjedhje
Lideri i Unionit Kristian Demokrat (CDU), Friedrich Merz, pritet të kërkojë në mënyrë indirekte një votëbesim nga udhëheqja e partisë së tij, nën presionin e një sërë rezultatesh negative në zgjedhje dhe vlerësimeve të ulëta në sondazhet e opinionit publik. Kjo lëvizje vjen mes shqetësimeve për performancën e partisë dhe të vetë Merz-it.
Sipas raportimeve të revistës “Stern” dhe faqes “Table.Media”, Merz planifikon t’i paraqesë komitetit ekzekutiv të CDU-së një ultimatum të dielën në mbrëmje, pas zgjedhjeve shtetërore në Meklenburg-Pomeraninë Perëndimore dhe Berlin. Ai do të kërkojë një marrëveshje unanime për një kurs të unifikuar reformash nën drejtimin e tij, ose do të ofrojë dorëheqjen. Megjithatë, theksohet se ai nuk ka ndërmend të largohet vullnetarisht nga detyra.
Anëtarët e komitetit janë ftuar tashmë për një takim të dielën në orën 17:00 me orën lokale, siç thekson “Stern”.
Përveç kësaj, faqja e internetit “Table.Briefing” bën me dije se Friedrich Merz do të paraqesë një sërë pikash strategjike me të cilat partia synon të fillojë diskutimet me partnerin qeveritar, Partinë Socialdemokrate (SPD). Këto propozime përfshijnë lehtësime më të larta tatimore dhe masa konkrete për uljen e çmimeve të energjisë.
Me anë të këtij veprimi, lideri i CDU-së synon të sigurojë mbështetjen e kryeministrave të landeve, Hendrik Wüst, Daniel Günther dhe Boris Rhein.
Për të demonstruar angazhimin e tij, Merz madje ka shtyrë nisjen e tij për në Asamblenë e Përgjithshme të Kombeve të Bashkuara në Nju Jork, me qëllim që të jetë i pranishëm në takimin e grupit parlamentar të CDU-së të martën.
Ditët e fundit, në mediat gjermane kanë qarkulluar spekulime mbi zëvendësimin e mundshëm të Friedrich Merz në kancelari, një skenar që thuhet se mbështetet nga rreth 30 deputetë të CDU-së.
Në këtë kontekst, ministri federal i Brendshëm, Alexander Dobrindt (CSU), ka mohuar zërat se ai mund të ishte një kandidat i mundshëm për zëvendësimin e kancelarit. Gjithashtu, kreu i partisë së tij, Markus Söder, ka theksuar më herët se CSU nuk do të shkaktonte rrëzimin e qeverisë.