Pranon Vrasjen e Shqiptarit në Itali: 29-vjeçari Italian e Fshehu Trupin në Pus
Një ngjarje tragjike ka tronditur Italinë, ku shqiptari 31-vjeçar Denaldo Maxhallaku është gjetur i pajetë në fund të një pusi betoni për kullimin e ujërave. Viktima, i cili jetonte në Gatteo dhe punonte si bojaxhi, ishte zhdukur që nga mbrëmja e 8 tetorit. Për këtë krim është ndaluar një 29-vjeçar italian, banues në Longiano, i cili ka pranuar përgjegjësinë gjatë marrjes në pyetje nga karabinierët, duke deklaruar: “Isha unë”.
Sipas medias italiane “Il Resto del Carlino”, trupi i Maxhallakut u gjet në zonën e Felloniche, në Longiano, përgjatë rrugës Fondovalle Rubicone. Rindërtimi i ngjarjes nga hetuesit sugjeron se viktima dhe i dyshuari ishin takuar mbrëmjen e zhdukjes në banesën e 29-vjeçarit. Aty, një debat mes tyre dyshohet se ka përfunduar në një përplasje të dhunshme. Shkak i konfliktit ishte, sipas medias italiane, një borxh i konsiderueshëm që i dyshuari kishte për drogë.
Gjatë marrjes në pyetje, 29-vjeçari ka pretenduar se ndihej i kërcënuar dhe kishte frikë për veten dhe familjen e tij, duke thënë: “Kisha frikë për veten dhe familjen time, u ndjeva i kërcënuar”. Ai shpjegoi se kishte humbur kontrollin e situatës. Pas vrasjes, i dyshuari dyshohet se e kishte transportuar trupin e shqiptarit dhe e kishte fshehur në pus, pranë zonës së fushave. Më pas, ai dyshohet se i kishte vënë flakën makinës së viktimës, në përpjekje për të zhdukur gjurmët e krimit.
Hetuesit arritën te 29-vjeçari pasi analizuan të dhënat e komunikimeve telefonike dhe konstatuan se ai ishte personi i fundit që kishte pasur kontakte me Denaldo Maxhallakun. I dyshuari mbahej në kazermën e karabinierëve në Savignano dhe pritej të transferohej në burgun e Forlit, në pritje të seancës për vleftësimin e ndalimit. Ndërkohë, të shtunën pritej të caktohej eksperti për kryerjen e autopsisë.
Bashkëshortja e Denaldo Maxhallakut, e cila po asistohet nga avokati Raffaele Pacifico, ka rrëfyer dhimbjen për humbjen e tij. Ajo tha se bashkëshorti ishte larguar nga shtëpia më 8 tetor duke u thënë se do të shkonte në një lokal dhe do të kthehej në mbrëmje. “Ai ishte një bashkëshort i pranishëm, një baba i kujdesshëm, e donte shumë vajzën tonë vetëm një vjeçe dhe ishte një punëtor i palodhur,” është shprehur ajo, sipas medias italiane.