Serbia Nis Procedurat Për Varrimin e Ratko Mlladiçit me Nderime Shtetërore dhe Ushtarake
Serbia ka nisur hapat për të bërë të mundur varrimin e Ratko Mlladiçit në Beograd, sipas raportimeve të fundit nga mediat serbe. Ky proces thuhet se është iniciuar nëpërmjet Presidencës dhe ministrive relevante, me qëllim përmbushjen e dëshirës së fundit të ish-komandantit të ushtrisë serbe të Bosnjës.
Gazeta “Informer” dhe media të tjera lokale bëjnë me dije se Mlladiç pritet të varroset me ceremoni që përfshijnë nderime shtetërore dhe ushtarake. Megjithatë, detaje zyrtare në lidhje me datën e kthimit të trupit në Serbi apo zhvillimin e ceremonisë mortore nuk janë bërë ende publike.
Ratko Mlladiç vdiq së fundmi në Hagë, ku po vuante dënimin me burgim të përjetshëm. Ai ishte shpallur fajtor nga Tribunalit i Hagës për krime të rënda, përfshirë gjenocidin, krimet kundër njerëzimit dhe krimet e luftës, me një theks të veçantë në rolin e tij kyç në masakrën e Srebrenicës.
Aktakuza e parë ndaj Mlladiçit u ngrit më 24 korrik 1995. Pas përfundimit të luftës, ai qëndroi në arrati për shumë vite, duke u shndërruar në një nga të akuzuarit më të kërkuar për krime lufte në kontinentin evropian. Arrestimi i tij u bë më 26 maj 2011, në fshatin Lazarevo të Serbisë, në shtëpinë e një të afërmi. Pesë ditë më vonë, ai u transferua në njësinë e paraburgimit të Tribunalit të Hagës.
Procesi gjyqësor nisi zyrtarisht më 16 maj 2012, ku u dëgjuan qindra dëshmitarë dhe u prezantuan mijëra prova materiale. Më 22 nëntor 2017, Dhoma Gjyqësore e Tribunalit e dënoi Mlladiçin me burgim të përjetshëm, duke e shpallur fajtor për 10 nga 11 pikat e aktakuzës.
Ndër krimet për të cilat u dënua, përfshihen gjenocidi në Srebrenicë, persekutimi, shfarosja, vrasja, dëbimet, zhvendosjet me forcë, terrorizimi i popullsisë së Sarajevës, sulmet e paligjshme ndaj civilëve dhe marrja peng e pjesëtarëve të Kombeve të Bashkuara. Mlladiç u shpall i pafajshëm vetëm për akuzën e gjenocidit në gjashtë komuna të Bosnjë dhe Hercegovinës gjatë vitit 1992.
Vendimi përfundimtar, që konfirmoi dënimin me burgim të përjetshëm, u mor nga trupi gjykues i apelit i Mekanizmit më 8 qershor 2021, duke shënuar fundin e procesit të gjatë gjyqësor ndaj tij.