Vlorë: Katër punonjës evakuohen nga guroreja, zjarri në Shashicë vazhdon të përhapet
Një zjarr me përmasa të mëdha ka përfshirë zonën e Shashicës në Vlorë, duke vijuar të shkaktojë shqetësime dhe duke vënë në lëvizje autoritetet. Si pasojë e përhapjes së flakëve, katër punonjës të një guroreje në këtë zonë u detyruan të evakuoheshin pasi kishin qëndruar për të mbrojtur pajisjet nga zjarri.
Fillimisht, punonjësit kishin refuzuar të largoheshin, duke u përpjekur të siguronin mjetet dhe infrastrukturën e gurores. Megjithatë, për shkak të rritjes së shkallës së rrezikut, pavarësisht se vatra e zjarrit ndodhej në një distancë relative nga ambientet e tyre të punës, autoritetet vendosën për largimin e tyre të menjëhershëm.
Një mjet zjarrfikës u dërgua me shpejtësi në drejtim të gurores për të bërë të mundur nxjerrjen e sigurt të katër personave, duke parandaluar kështu çdo rrezik për jetën e tyre.
Ndërkohë, zjarri vazhdon të përhapet në sipërfaqe të gjera në Shashicë. Autoritetet vendore kanë bërë me dije se situata po monitorohet në mënyrë të vazhdueshme, por ndërhyrja efikase në terren mbetet tejet e vështirë. Kjo vështirësi lidhet kryesisht me intensitetin e zjarrit dhe erërat e forta, të cilat favorizojnë përhapjen e shpejtë të flakëve.