Vrasja në Shkodër: Karamuço detajon dinamikën, autori dyshohet nën efektin e alkoolit kur shkoi në banesën e viktimës
Eksperti i sigurisë, Ervin Karamuço, ka ofruar detaje të reja lidhur me ngjarjen e rëndë që tronditi Shkodrën, ku humbi jetën i riu Ylber Luli dhe u plagos babai i tij. I ftuar në emisionin “Now” me Erla Mëhillin në Euronews Albania, Karamuço shpalosi një panoramë të plotë të dinamikës së krimit, duke theksuar se edhe autori i vrasjes ka mbetur i plagosur gjatë konfliktit.
Sipas Karamuços, ngjarja fatale fillimisht ka pasur zanafillën pas një debati në një lokal. Pas kësaj përplasjeje fillestare, viktima është larguar drejt banesës së tij. Autori, bashkë me një shok, ka pritur për rreth tre orë në makinë, me shpresën se viktima do të kthehej sërish në lokal. Megjithatë, kjo nuk ka ndodhur dhe i riu nuk ka dalë më nga banesa.
Karamuço shpjegoi se pasi shoku i autorit ishte larguar, në orën 05:00 të mëngjesit, autori nuk ka duruar më. Ai ka shkuar i armatosur drejt banesës së viktimës. Eksperti theksoi mundësinë që autori në atë moment të ketë qenë nën efektin e alkoolit ose substancave të tjera. Pas trokitjes në derë, fillimisht ka dalë djali, me të cilin kishte pasur konfliktin e mëparshëm. Mes tyre ka pasur një përplasje fizike.
Më pas, në skenë ka dalë babai i viktimës, i armatosur me thikë. Gjatë kësaj përplasjeje, është plagosur edhe vetë autori. Në një moment të dytë, ai ka nxjerrë pistoletën, duke qëlluar për vdekje djalin dhe duke plagosur babanë. Karamuço shtoi se ngjarje të tilla shpesh mund të kenë një histori të mëparshme konfliktesh apo fërkimesh mes palëve.