Zjarr në pikën e karburantit te Brryli: Drejtori i Zjarrfikëses detajon shpërthimin në zyra, vijojnë hetimet
Një incident i rëndë ka ndodhur në një pikë karburanti në zonën e Brrylit në Tiranë, ku një zjarr ka përfshirë ambientet pas një shpërthimi. Drejtori i Shërbimit Zjarrfikës Tiranë, Shkëlqim Goxhaj, ka konfirmuar për mediat se shpërthimi ka ndodhur në zyrat e karburantit, duke qenë pika fillestare e ngjarjes.
Goxhaj theksoi se ekipet e zjarrfikësve kanë ndërhyrë për të vënë nën kontroll situatën, ndërsa hetimet për zbardhjen e shkaqeve të shpërthimit janë ende në vijim. Sipas tij, një prej pistave që po hetohet është mundësia që një automjet të ketë goditur zyrat e pikës së karburantit, duke shkaktuar më pas shpërthimin.
Drejtori i Zjarrfikëses bëri me dije se autoritetet po punojnë intensivisht dhe pritet që shkaku i plotë i incidentit të zbardhet brenda ditës së sotme.