Giorgia Meloni në pushime familjare: Kryeministrja italiane shkëputet në Sardenjë, pamjet nga varka tërheqin vëmendjen
Kryeministrja italiane, Giorgia Meloni, po shijon disa ditë pushimi larg angazhimeve politike, duke kaluar kohë cilësore me vajzën e saj, Ginevra, në ishullin e Sardenjës. E vendosur mes bukurive natyrore të arkipelagut të La Maddalena-s, në ujërat që lidhin Caprera-n, Spargin dhe Budelli-n, Meloni po përfiton nga temperaturat e larta të gushtit për t’u çlodhur në det.
Një moment i veçantë nga pushimet e saj, i kapur nga revista italiane “Gente”, ka tërhequr vëmendjen e publikut. Pamjet tregojnë kryeministren teksa hidhet nga një varkë në ujërat kristal të Sardenjës. E veshur me një kostum banje të zi njëpjesësh dhe syze dielli, Meloni shfaqet dukshëm e relaksuar dhe larg protokollit zyrtar që e shoqëron zakonisht.
Gjatë qëndrimit të tyre, Meloni dhe vajza e saj kanë eksploruar ujërat e kaltra dhe peizazhet mahnitëse të arkipelagut. Ato kanë kaluar orë të tëra në varkë, duke notuar, duke u marrë me diell dhe duke shijuar shoqërinë e njëra-tjetrës. Sipas raportimeve, vajza, Ginevra, po shfaq gjithnjë e më shumë ngjashmëri me nënën e saj, ndërsa edhe stili i ri i flokëve të kryeministres është komentuar.
Pas ditëve në Sardenjë, pushimet e Giorgia Melonit pritet të vijojnë në Salento, një tjetër destinacion i njohur në jug të Italisë. Më pas, ajo do të rikthehet në Palazzo Chigi në Romë, për të rifilluar agjendën e ngjeshur politike. Këtë verë, pushimet e saj janë karakterizuar nga një përpjekje për të ruajtur privatësinë, megjithatë disa momente të çlodhjes së saj buzë detit janë arritur të dokumentohen nga fotografët.