Pjerin Ndreu reagon pas largimit të Marjana Koçekut nga grupi i PS-së: Lënia e mandatit, akt fisnikërie
Kryetari i Bashkisë së Lezhës, Pjerin Ndreu, ka adresuar së fundmi, përmes një postimi në rrjetin social “Facebook”, vendimin e deputetes Marjana Koçeku për t’u shkëputur nga grupi parlamentar i Partisë Socialiste.
Në reagimin e tij, Ndreu theksoi se dorëzimi i mandatit të deputetes, të fituar falë votave të mijëra socialistëve shkodranë, do të përbënte një gjest fisnik për Koçekun, të cilën ai e konsideron mikeshë. Ai qartësoi se ky zhvillim nuk shkakton një “dramë” për Partinë Socialiste, por vlerësohet si një shkelje e thellë besimi.
Ndreu u shpreh se vlera tradicionale e malësorëve, përfshirë edhe “neomalësorët”, ka qenë gjithmonë ruajtja e integritetit dhe mosshfrytëzimi i asaj që u është dhënë me mirëbesim dhe respekt. Ai pranoi mundësinë që çdo individ, në rrethana të caktuara, të ndryshojë bindjet politike apo të mos e gjejë më veten brenda një force politike, duke e cilësuar këtë si një fenomen krejt normal.
Megjithatë, kreu i Bashkisë së Lezhës vuri në dukje se nderi i pozicionimit në krye të listës politike të një prej qarqeve më të mëdhenj në veri, pa një histori të mëparshme kontributi politik, moralisht nuk duhet keqpërdorur. Sipas tij, abuzimi me një mandat të dhënë politikisht nga PS-ja përbën një thyerje të besimit.
Ndreu e mbylli reagimin e tij me një thirrje për të mbajtur lart “moralin e malësorit”, duke cituar shprehjen “aty ku ha bukë, nuk përmbys kupën”, dhe duke sugjeruar se ky parim duhet të mbizotërojë përtej “ekzaltimeve të disave” që mund të besojnë se situata është dramatike.