GJKKO vendos “arrest me burg” për ish-zyrtarin Uljan Shpataraku, i sekuestrohet arsenal armësh
Gjykata e Posaçme kundër Korrupsionit dhe Krimit të Organizuar (GJKKO) ka vendosur masën e sigurisë “arrest me burg” për Uljan Shpatarakun, ish-zyrtar i Policisë së Shtetit. Ky vendim vjen në kuadër të hetimeve ku Shpataraku dyshohet për përkrahje të autorit të krimit, si dhe pas sekuestrimit të një arsenali armësh në banesën e tij.
Shpataraku u arrestua disa kohë më parë nën dyshimin se kishte shoqëruar Ergys Agasin, një personazh ky i dyshuar si autor i një krimi. Për shkak të këtij incidenti, ai ishte përjashtuar nga radhët e Policisë së Shtetit disa javë para se të vendosej masa e sigurisë nga GJKKO.
Menjëherë pas arrestimit, nisën procedurat ligjore për heqjen e lejes së armës që Shpataraku posedonte falë funksionit të tij si punonjës policie. Gjatë kontrolleve të kryera në banesën e tij, u zbulua dhe u sekuestrua një arsenal i konsiderueshëm armësh. Konkretisht, janë sekuestruar gjithsej 7 armë zjarri: 3 pistoleta, 2 shotgunë dhe 2 pushkë.
Verifikimet e kryera treguan se disa prej këtyre armëve private mbaheshin me leje nga ish-zyrtari policor, të cilat i ishin lëshuar për shkak të pozicionit të tij. Megjithatë, pas ndryshimit të statusit të tij dhe dyshimeve për përfshirje në veprimtari kriminale, leja e armës iu hoq dhe i gjithë arsenali u mor në posedim nga organet e drejtësisë, si pjesë e procedurave hetimore.