Lirohet komediani turk i dënuar për “fyerje ndaj Erdogan”, ai këmbëngul: “Diktator nuk është fyerje”
Një gjykatë në Stamboll ka urdhëruar lirimin e komedianit të njohur Deniz Goktas, pasi e dënoi atë me rreth 19 muaj burg për akuzën e fyerjes ndaj Presidentit turk Recep Tayyip Erdogan. Lirimi i tij vjen për shkak të kohës së kaluar tashmë në paraburgim, ndonëse ndaj tij është vendosur një ndalim udhëtimi. Çështja pritet të shqyrtohet sërish nga gjykata e apelit.
Goktas, i cili ka mohuar akuzat e ngritura ndaj tij, kishte kaluar rreth 90 ditë në qeli përpara dënimit. Prokurorët fillimisht kishin kërkuar një dënim deri në 12 vjet burg për komedianin, i cili u bë i njohur me performancat e tij humoristike që shpesh trajtonin tema politike.
Akuzat ndaj Goktas erdhën pas një performance të tijën virale në YouTube, e cila ka grumbulluar mbi 15 milionë shikime. Në thelb të çështjes ishte një pjesë e shfaqjes ku komediani e cilësoi liderin turk si “një diktator të turpshëm”. Megjithatë, Goktas ka këmbëngulur se komentet e tij nuk përmbanin “asnjë element kriminal”.
“Diktator nuk është fyerje, është një karakterizim politik,” deklaroi ai, duke mbrojtur lirinë e shprehjes artistike dhe satirike.
Pas daljes nga burgu, Goktas iu drejtua gazetarëve, duke theksuar se situata e tij është pjesë e një problemi më të gjerë në Turqi. “Ka mijëra njerëz të tjerë në burgjet e Turqisë. Disa, si unë, po mbahen në paraburgim, ndërsa të tjerë janë dënuar për shkak të pikëpamjeve të tyre,” tha ai. “Prandaj, sigurisht, është e mrekullueshme të jem jashtë. Më ka munguar shumë. Por nuk ka shumë ndryshim mes brenda dhe jashtë. Shpresoj që të vijë dita kur të gjithë të mund ta rifitojmë lirinë së bashku.”
Çështja e Goktas reflekton shqetësimet e organizatave të të drejtave të njeriut për shtypjen e zërave kundërshtues në Turqi. Burgjet turke aktualisht janë të mbipopulluara, me qindra gazetarë, aktivistë, studentë protestues, aktivistë të komunitetit LGBTQ dhe figura politike opozitare, përfshirë kryebashkiakun e zgjedhur të Stambollit, Ekrem Imamoglu, që vazhdojnë të mbahen pas hekurave.
Në të kaluarën, Presidenti Erdogan dhe partia e tij kanë hedhur poshtë akuzat për motivim politik të arrestimeve të tilla, si ai i Imamoglut, duke insistuar se sistemi i drejtësisë në Turqi është plotësisht i pavarur.