BioNTech mbyll tre fabrika në Gjermani, preken 1,800 vende pune
Gjigandi farmaceutik gjerman BioNTech, i njohur globalisht për zhvillimin e vaksinës së parë kundër COVID-19, ka njoftuar planet për të mbyllur tre prej fabrikave të tij në Gjermani. Ky vendim pritet të prekë rreth 1,800 vende pune dhe vjen si pasojë e dështimit për të gjetur blerës për këto njësi.
Kompania, me seli në Mainz, bëri me dije se njësitë e prekura janë ato në qytetet Tübingen, Marburg dhe Indar-Oberstein. Mbyllja e fabrikës në Tübingen është planifikuar për fundin e vitit 2027, ajo e Marburgut në fillim të vitit 2028, dhe ajo e Indar-Oberstein në fund të vitit 2028.
BioNTech shpjegoi se pamundësia për të shitur këto objekte është kryesisht për shkak të kushteve aktuale të vështira të tregut dhe klimës së investimeve. Kompania, e cila së bashku me Pfizer ishte e para që mori miratimin për të tregtuar vaksinën kundër COVID-19, gjeneroi miliarda dollarë fitime nga ky produkt. Megjithatë, kërkesa për vaksina kundër koronavirusit ka rënë ndjeshëm vitet e fundit, ndërkohë që BioNTech nuk ka sjellë në treg ndonjë produkt tjetër madhor.
Për të siguruar që mbyllja e objekteve të kryhet në një mënyrë të përgjegjshme socialisht, kompania ka rënë dakord me këshillin e punës për kushte shtesë të shkurtimit të vendeve të punës. Aktualisht, BioNTech punëson rreth 7,200 njerëz në mbarë botën.
Prej disa vitesh, BioNTech ka ndërmarrë një proces transformimi dhe ristrukturimi, duke u përqendruar në kërkimin dhe zhvillimin e një game të gjerë produktesh të reja, veçanërisht në fushën e onkologjisë. Përpjekjet e saj janë drejtuar drejt imunoterapive të bazuara në mRNA dhe përdorimit të kombinuar të antitrupave me barna, me qëllim shpërndarjen më të targetuar të ilaçeve të kimioterapisë në qelizat kancerogjene.
Këto investime të rëndësishme në kërkim dhe zhvillim kanë sjellë humbje të konsiderueshme për kompaninë. Në gjysmën e parë të këtij viti, rezultatet neto treguan një humbje prej 1.35 miliardë eurosh.
Në një zhvillim tjetër, drejtuesit kryesorë dhe themeluesit e kompanisë, Ugur Sahin dhe Ozlem Turecci, do të largohen nga BioNTech deri në fund të vitit. Ata do t’i përkushtohen zhvillimit të gjeneratës së ardhshme të barnave të bazuara në mRNA në një kompani të re.