Analisti Vokshi: Dënimi i ish-krerëve të UÇK-së, një prapaskenë konflikti me Gjermaninë
Analisti Indrit Vokshi, i ftuar së fundmi në emisionin “Review” me Greta Topjanën, ka ofruar një perspektivë të ndryshme mbi motivet pas dënimit të ish-krerëve të Ushtrisë Çlirimtare të Kosovës. Sipas Vokshit, kjo çështje nuk lidhet thjesht me interesat e Serbisë apo Rusisë, por është thellësisht e ndërthurur me një konflikt të gjatë mes ish-Presidentit Hashim Thaçi dhe Gjermanisë.
Vokshi e përshkroi situatën aktuale si “fazën e fundit” të një përplasjeje mes Hashim Thaçit dhe Shërbimit Federal të Inteligjencës Gjermane (BND), si dhe shtetit gjerman në përgjithësi. Ai argumentoi se Gjermania ka qenë “investitori më i madh” në përpjekjet për t’i larguar krerët e UÇK-së nga arena politike, duke theksuar se çdo qeveri gjermane ka pasur një plan për këtë qëllim.
Për të mbështetur tezën e tij, analisti citoi një raport konfidencial të BND-së nga shkurti i vitit 2005, ku Hashim Thaçi, Ramush Haradinaj, Fatmir Limaj dhe Xhavit Haliti konsideroheshin si “banda kriminale” dhe një “grup kriminal i Drenicës.” Më tej, Vokshi kujtoi ngjarjen e nëntorit 2008, kur Policia e Kosovës arrestoi tre agjentë të shërbimit sekret gjerman. Njëri prej tyre, Andreas Jakel, u gjet me shënime mbi situatën në Kosovë dhe emrat e bashkëpunëtorëve të shërbimit sekret gjerman brenda rrethit të ngushtë të Hashim Thaçit. Ky informacion, sipas Vokshit, është konfirmuar edhe nga WikiLeaks, dhe synonte përgjimin dhe inkriminimin e krerëve të UÇK-së.
Vokshi bëri një lidhje mes këtyre ngjarjeve dhe raportit të Dick Martyt nga Asambleja Parlamentare e Këshillit të Evropës, një institucion që ai sugjeroi se “kontrollohet nga evropianët.” Pas raportit të Martyt, vijoi themelimi i Prokurorisë Speciale dhe Task Forcës, të drejtuar nga prokurori amerikan Clint Williamson, i emëruar në atë kohë nga Catherine Ashton. Raporti i Williamson i vitit 2014, sipas Vokshit, përmban akuzat që çuan në ngritjen e padive. Kjo tregon, tha ai, një proces të udhëhequr nga një prokuror amerikan me mbështetje evropiane.
Konflikti u thellua më tej në vitin 2020, kur Hashim Thaçi deklaroi se negociatat duhet të zhvendoseshin nga Evropa në Washington. Sipas interpretimit të Vokshit, arrestimi i Thaçit nga “struktura të forta dhe shumë të fuqishme” evropiane erdhi sepse ai “u mor nga tavolina e Presidentit Trump.” Ai theksoi se edhe Dick Marty, në raportin e tij, ka marrë informacione nga shërbime të shumta. Në përmbyllje, analisti sugjeroi se bëhet fjalë për një “plan kundër krerëve të Ushtrisë Çlirimtare të Kosovës, që nga viti 2005, nga krerët e politikës evropiane,” duke e lidhur këtë me sfondin e lançimit të një projekti të përbashkët Rusi-Gjermani në të njëjtin vit.