Berisha e cilëson “ndjesë të një monstre” korrigjimin e deklaratës së ministres serbe, përsërit kërkesën “non grata”
Kryetari i Partisë Demokratike, Sali Berisha, ka reaguar sërish me tone të ashpra lidhur me deklaratat e ministres serbe, Snezana Paunoviç, të cilat u pasuan nga një tërheqje e pjesshme prej saj. Berisha e ka quajtur këtë “ndjesë të një monstre”, duke theksuar se ajo tregon një mentalitet racist dhe mungesë thelbësore reflektimi.
Reagimi i tij vjen pasi ministrja Paunoviç deklaroi fillimisht se, po të ishte në pozicionin e Sllobodan Millosheviçit në vitin 1998, ajo do të kishte kryer “spastrim etnik” në Kosovë. Kjo deklaratë shkaktoi një valë të fortë reagimesh dhe dënimesh ndërkombëtare.
Pas presionit, Paunoviç u përpoq të “korrigjojë” fjalët e saj, duke theksuar se ajo duhej të kishte përdorur termin “deportim” dhe jo “spastrim etnik”. Për Berishën, ky ndryshim termash nuk ndryshon thelbin e qëndrimit të saj, por përkundrazi, dëshmon vazhdimësinë e një mendësie raciste dhe çnjerëzore.
Në një deklaratë të publikuar, Berisha theksoi se “ndjesa e një monstre! Deklarata e Snezhana Paunoviçit, ministre në qeverinë e Aleksandar Vuçiqit, se ‘po të ishte në vend të Sllobodan Millosheviçit më 1998, do ta spastronte etnikisht Kosovën’, shkaktoi reagime të shumta.” Ai shtoi se kjo deklaratë dëshmon se për ministren, gjenocidi shikohet si një mënyrë për zgjidhjen e problemeve ndëretnike.
Lideri i Partisë Demokratike kujtoi se ndaj deklaratës së Paunoviçit reaguan ashpër zëdhënësja e Komisionit Evropian, Komisionerja për Zgjerim, Ministria e Jashtme e Britanisë së Madhe, deputetë evropianë, si dhe dhjetëra deputetë e personalitete në Serbi.
Në të njëjtën kohë, Berisha kritikoi ashpër heshtjen e qeverisë shqiptare përballë kësaj situate, duke e cilësuar atë si “heshtje si fija e barit”. Ai përsëriti kërkesën që ministrja serbe të shpallet “non grata” dhe të ngrihet padi për nxitje të gjenocidit kundër saj.