Nasim Haradinaj u bën thirrje për unitet protestuesve: Nuk kemi asgjë me policinë, kërkojmë veprime konkrete nga politika
Ish-komandanti i Ushtrisë Çlirimtare të Kosovës, Nasim Haradinaj, iu është drejtuar sot protestuesve të mbledhur para objektit të Qeverisë në Prishtinë. Tubimi vjen si reagim ndaj dënimeve të shqiptuara nga shkalla e parë e Dhomave të Specializuara të Kosovës në Hagë për katër ish-krerët e UÇK-së.
Gjatë fjalës së tij, Haradinaj theksoi qartë se protestuesit nuk kishin “asnjë gjë” me Policinë e Kosovës. “Asnjë gjë me Policinë tonë nuk kemi,” deklaroi ai, duke orientuar kritikën dhe kërkesat e tyre drejt klasës politike të vendit.
Haradinaj argumentoi se problemi qëndron te përfaqësuesit politikë, duke theksuar se “ata nuk na përfaqësojnë veç një parti, por të gjithë kanë gabime”. Në këtë kontekst, ai bëri thirrje të fuqishme për unitet, bashkim dhe ndërmarrjen e veprimeve konkrete nga e gjithë skena politike e Kosovës. “E gjithë politika bashkë! Bashkim! Bashkim! Bashkim! Vetëm kjo na çon përpara,” ishte mesazhi i tij drejtuar turmës.
Protesta pason vendimin e Gjykatës Speciale, e cila dënoi Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet burgim, ndërsa Rexhep Selimin me 13 vjet burgim.