Protesta e 57-të vazhdon në Tiranë, qytetarët marshojnë me thirrje për dorëheqje dhe paralajmërojnë tubim te Parlamenti
Tirana ka përjetuar ditën e 57-të të protestave të qytetarëve, të cilët pas grumbullimit para Kryeministrisë, kanë marshuar në rrugët kryesore të kryeqytetit. Gjatë marshimit, protestuesit kanë ripërsëritur thirrjet e tyre për dorëheqjen e kryeministrit Edi Rama dhe largimin e kabinetit qeveritar.
Gjatë kalimit, një ndalesë e shkurtër u bë para godinës së Parlamentit, ku ishin vënë re forca policore dhe barriera metalike. Këto masa sigurie janë marrë në funksion të një proteste tjetër të paralajmëruar për paraditen e së hënës, pikërisht përpara Kuvendit.
Aktivisti Arben Kola, pak para nisjes së tubimit të sotëm, u ka bërë thirrje publike qytetarëve që të mblidhen nesër, më 27 korrik, në sheshin “Skënderbej”. Nga aty, do të nisë një marshim drejt godinës së Kuvendit të Shqipërisë, me qëllim zhvillimin e protestës.
Kjo protestë pritet të zhvillohet paralelisht me dy seancat e fundit plenare të këtij sesioni parlamentar, duke shtuar presionin ndaj legjislativit. Tubimi i së hënës vjen menjëherë pas protestës së zhvilluar të enjten e kaluar përpara Parlamentit, e cila u shoqërua me tensione të shumta mes protestuesve dhe forcave të rendit.