Kurti nga Veriu i Kosovës: Drejtësia Do të Veprojë, Asnjë Kriminel Nuk Do të Mbetet i Pandëshkuar
Kryeministri në detyrë i Kosovës, Albin Kurti, zhvilloi sot një vizitë në veri të vendit, ku bëri homazhe te lapidari i heroit të rënë, Enver Zymeri, në Varage të Zubin Potokut. Gjatë kësaj vizite, Kurti theksoi rëndësinë e sundimit të ligjit dhe dërgoi një mesazh të qartë se asnjë kriminel nuk do t’i shpëtojë ndëshkimit.
I shoqëruar nga ministri në detyrë i Punëve të Brendshme, Xhelal Sveçla, Kurti nderoi kujtimin e policit Zymeri, duke theksuar se 15-vjetori i rënies heroike të tij shërben si një kujtesë për sakrificën dhe vetëmohimi që duhet të marrin si shembull të gjithë zyrtarët shtetërorë. Ai iu drejtua edhe policëve të pranishëm, duke vlerësuar kontributin e tyre.
“Është një obligim i yni, që t’i marrim këta si shembull të gjithë ne që jemi zyrtarë shtetërorë, për nga sakrifica dhe vetëmohimi,” deklaroi Kurti. Ai theksoi se falë Enver Zymerit, Afrim Bunjakut dhe kolegëve të tyre, sot në veriun e Kosovës mbretëron sundimi i ligjit, paqja dhe siguria për të gjithë, pa dallim.
Gjatë fjalës së tij, Kryeministri në detyrë lidhi rastin e Zymerit me zhvillimet e tjera në rajon, duke përmendur 20-mujorin e hedhjes në erë të kanalit Ibër-Lepenc, i cili furnizon me ujë më shumë se gjysmën e Republikës dhe termocentralet në Obiliq. Kurti konfirmoi se për këtë rast, tre persona ndodhen në burg dhe procesi i drejtësisë është në vazhdim.
“Për urdhërdhënësit dhe dorën kriminale që e vrau heroin e Kosovës, Enver Zymerin, natyrisht që herët a vonë drejtësia do të veprojë, sepse asnjë kriminel nuk do të lejohet që të mbijetojë i pandëshkuar. Prandaj edhe prokuroria dhe gjyqësia jonë e kanë mbështetjen tonë dhe e kanë detyrën e tyre,” theksoi Kurti, duke garantuar përkrahjen institucionale për sistemin e drejtësisë.
Më herët gjatë ditës, Kryeministri në detyrë kishte bërë homazhe edhe te lapidari në Prishtinë, kushtuar të gjithë policëve të rënë në detyrë, si dhe vizitoi familjet e policëve të rënë, duke nderuar kujtimin e tyre, përfshirë Enver Zymerin dhe Afrim Bunjakun.