Gjykata Australiane Shpall të Pafajshme Rebel Wilson në Padinë për Shpifje
Aktorja e mirënjohur e Hollivudit, Rebel Wilson, është shpallur e pafajshme nga gjykata australiane, duke mbyllur një betejë ligjore intensive për shpifje. Padia u ngrit nga aktorja australiane Charlotte MacInnes, e cila luajti rolin kryesor në filmin debutues të Wilson si regjisore, “The Deb”.
Vendimi i gjykatës, i shpallur të mërkurën, konfirmoi pafajësinë e Wilson. Aktorja shprehu falënderimet e saj ndaj gjyqtares dhe sistemit ligjor australian, duke theksuar se ky proces e kishte forcuar besimin e saj për të mbrojtur atë që beson se është e drejtë dhe për të vazhduar të krijojë vepra që u sjellin gëzim njerëzve.
MacInnes e kishte paditur Wilson-in, duke pretenduar se kjo e fundit e kishte shpifur përmes një sërë postimesh në mediat sociale. Këto postime, sipas MacInnes, nënkuptonin se ajo ishte gënjeshtare dhe një tradhtare, e cila kishte tërhequr një ankesë për ngacmim seksual me qëllim për të avancuar karrierën e saj.
Beteja ligjore u përqendrua rreth pretendimeve të Wilson se aktorja e re i ishte rrëfyer asaj se ndihej në siklet kur bashkëproducentja e filmit, Amanda Ghost, i kishte kërkuar të bënin një dush dhe një banjë së bashku. Nga ana e saj, MacInnes mohoi kategorikisht të kishte bërë ose tërhequr një ankesë të tillë, duke këmbëngulur se nuk ishte ndjerë në siklet kur ajo dhe Ghost ishin larë me rroba banje, pas një problemi mjekësor që Ghost kishte pësuar në shtator të vitit 2023.
Pas një procesi gjyqësor të ashpër që zgjati dy muaj në gjykatën federale, gjyqtarja Elizabeth Raper vendosi përfundimisht në favor të Rebel Wilson. Gjatë procesit, avokatja e MacInnes, Sue Chrysanthou SC, akuzoi Wilson-in se ishte një “gënjeshtare fantastike” që kishte sajuar akuza të rënda kundër shumë personave, duke theksuar se dëshmitarët e saj ishin diskredituar. “Ne themi se znj. Wilson nuk mund të besohet për asgjë që ka thënë,” deklaroi avokatja.
Në mbrojtje të Wilson, avokati i saj, Dauid Sibtain SC, argumentoi se klientja e tij “nuk kishte asnjë motiv për të gënjyer” për një çështje që do të rrezikonte filmin e saj dhe do të krijonte përçarje mes aktores kryesore dhe një producenti. Vendimi i gjykatës i jep fund kësaj çështjeje të profilit të lartë, duke shpallur Rebel Wilson të pafajshme nga akuzat për shpifje.