Presidenti i ‘Albanian Roots’ denoncon: Tentativa për anulimin e Paradës Shqiptare në Nju Jork, një vit punë e komunitetit e rrezikuar
Marko Kepi, kreu i organizatës “Rrënjët Shqiptare në Amerikë” (Albanian Roots), ka bërë publike përpjekjet e disa individëve për të sabotuar dhe kërkuar anulimin e Paradës Shqiptare në Nju Jork, e cila këtë vit i ishte dedikuar shqiptarëve të Maqedonisë së Veriut. Ai theksoi se komuniteti kishte punuar për një vit për realizimin e kësaj ngjarjeje të rëndësishme kulturore.
Gjatë një interviste për Euronews Albania, Kepi sqaroi se thirrjet për bojkot dhe protestat e organizuara nga këta persona, të cilët ai i cilësoi si të panjohur në diasporë, nuk kishin lidhje me kauza kombëtare apo problematikat aktuale në Shqipëri. Përkundrazi, sipas Kepit, ato kishin si qëllim të krijonin një imazh përçarës dhe të dëmtonin unitetin e komunitetit shqiptar në Amerikë.
Kepi bëri një diferencim të qartë mes këtyre protestave në Nju Jork dhe atyre që po zhvillohen në Shqipëri. Ai argumentoi se ndërsa populli në atdhe po kërkon ndryshim dhe drejtësi për shkak të dështimeve të sistemit politik ndër vite, grupi i protestuesve në Nju Jork, me pjesëmarrje të ulët (rreth 20 persona), po e dëmtonte këtë kauzë. Sipas tij, në vend që të mbështesnin lëvizjet legjitime në Shqipëri, ata kishin zgjedhur të sulmonin paradën dhe organizatorët e saj.
Ai theksoi se protestat në SHBA kishin përfshirë edhe sulme personale ndaj tij dhe se fjalimet e tyre ishin përqendruar kundër vetë paradës shqiptare dhe nxitjes për mos pjesëmarrje. Kepi vuri në dukje se organizatorët kryesorë nuk janë pjesë e diasporës tradicionale, madje njëri prej tyre udhëtonte nga Filadelfia për të protestuar në Nju Jork. Për këtë arsye, ai shpjegoi se shoqatat e mirëfillta dhe me histori të gjatë në SHBA nuk mund t’u bashkoheshin individëve me qëllime të paqarta, veçanërisht kur ata shfaqnin mesazhe kundër komunitetit dhe individëve që nuk janë të lidhur me qeverinë apo politikën shqiptare.
Pavarësisht këtyre përpjekjeve, Marko Kepi ripohoi angazhimin e tij për të mbështetur gjithmonë interesat e popullit shqiptar dhe kauzat që kontribuojnë në të mirën e Shqipërisë dhe të gjithë shqiptarëve, duke theksuar rëndësinë e drejtësisë.