Ministri Nufi: Shfrytëzimi i emrit të UÇK-së për qëllime politike është turpi më i madh
Ministri i Mbrojtjes, Ermal Nufi, ka shprehur ashpër kritikën e tij ndaj Dritan Goxhajt dhe protestës së zhvilluar të hënën, duke theksuar se përdorimi i emrit të Ushtrisë Çlirimtare të Kosovës (UÇK) për interesa personale apo politike përbën “turpin më të madh”. Reagimi i Nufit vjen në vijim të daljes së Goxhajt në krye të artikulimit të kërkesave të manifestimit.
Nëpërmjet një postimi publik, Ministri Nufi theksoi kontrastin mes atyre që morën pjesë aktivisht në luftë dhe atyre që, sipas tij, e mbështesin atë vetëm “nga divani”, duke refuzuar të jenë në vijën e frontit me shokët. Ai e krahasoi këtë qasje me kërkimin e “pëlqimeve” nga sheshi i një proteste, për të cilën pretendoi se nuk ka drejtim apo objektiva të qarta, madje edhe për ata që e mbështesin.
Nufi përdori fjalë të forta, duke deklaruar se “nuk ka turp më të madh se sa të hidhet baltë mbi gjakun dhe flamurin e UÇK-së – luftës më të lavdishme të popullit shqiptar për liri – duke e lidhur atë me sharlatanë që guxojnë të flasin në emër të heronjve të vërtetë”. Ai vazhdoi duke akuzuar se ata që pretendojnë të flasin në emër të patriotizmit duke dëmtuar interesat kombëtare shqiptare, kanë lidhje vetëm “me iranianët dhe/apo gjakprishurit”, dhe jo me UÇK-në.
Në fund të reagimit të tij, Ministri i Mbrojtjes bëri një diferencim, duke kujtuar se “Komandanti i vërtetë i UÇK-së është në Hagë, i mbajtur padrejtësisht”. Ai më pas lavdëroi Edi Ramën si “arkitektin e vërtetë të revolucionit të rrugëtimit të Shqipërisë drejt familjes së vlerave evropiane”, duke nënvizuar transformimin e vendit dhe përkrahjen masive të shqiptarëve ndaj tij dhe Partisë Socialiste me votën e tyre.