Aksident tragjik në Fier, humb jetën 34-vjeçari me motomjet
Një aksident me pasojë vdekjen ka tronditur pasditen e kësaj të premteje qarkun e Fierit, ku një 34-vjeçar ka humbur jetën pasi humbi kontrollin e motomjetit me të cilin po udhëtonte.
Ngjarja fatale u regjistrua rreth orës 17:10, në aksin rrugor që lidh Fierin me Lushnjën. Sipas informacioneve paraprake të ofruara nga Policia, shtetasi A.S., 34 vjeç, dyshohet se ka humbur kontrollin mbi drejtimin e motomjetit dhe si pasojë ka dalë nga rruga.
Për fat të keq, përplasja rezultoi fatale për drejtuesin e mjetit, i cili ndërroi jetë menjëherë në vendngjarje. Menjëherë pas marrjes së njoftimit, shërbimet e Policisë dhe grupi hetimor mbërritën në vendngjarje.
Ata kanë nisur punën për zbardhjen e plotë të rrethanave dhe përcaktimin e shkaqeve që çuan në këtë aksident tragjik. Hetimet janë në vijim e sipër dhe autoritetet ende nuk kanë dhënë detaje të tjera lidhur me dinamikën e saktë të ngjarjes.