Operacion në Porto Palermo: Nxirren nga thellësitë e detit dy predha të Luftës së Dytë Botërore
Dy predha luftarake, të cilat qëndronin në fundin e detit në Gjirin e Porto-Palermos prej më shumë se tetë dekadash, janë nxjerrë me sukses në sipërfaqe këtë të premte. Operacioni i ndërmarrë nga autoritetet shqiptare vjen në një zonë me frekuentim të lartë, sidomos gjatë sezonit turistik.
Këto mbetje të rrezikshme të Luftës së Dytë Botërore u lokalizuan pranë kalatave të ankorimit të anijeve turistike në zonë. Edhe pse të zhytura në thellësi për kaq shumë vite, predhat konsideroheshin ende me rrezikshmëri potenciale, duke e bërë ndërhyrjen urgjente dhe të domosdoshme për sigurinë publike dhe detare.
Operacioni i nxjerrjes u krye nga polumbarët e Bazës Ushtarake Detare të Pashalimanit. Për të garantuar sigurinë maksimale dhe koordinimin e duhur, në vendngjarje ishin të pranishëm edhe ekspertë të xhenios, ushtarakë të Forcave Detare të Shqipërisë, përfaqësues të emergjencave civile, si dhe zyrtarë nga Bashkia Himarë.
Pas nxjerrjes së sigurt nga uji, dy predhat luftarake janë marrë në dorëzim nga ekspertët e ushtrisë. Ato do të transportohen në një ambient të përshtatshëm dhe të sigurt për t’u asgjësuar, duke eliminuar përfundimisht çdo rrezik të mundshëm që mund të paraqitnin për lundrimin dhe aktivitetet detare në Porto Palermo.