SpaceX Forcon Pozicionin në AI: Blen Startup-in Cursor për 60 Miliardë Dollarë Pas Listimit në Nasdaq
Kompania hapësinore e Elon Musk, SpaceX, ka njoftuar një lëvizje strategjike të rëndësishme në fushën e inteligjencës artificiale, duke rënë dakord të blejë startup-in e kodimit me AI, Cursor (Anysphere), për një vlerë marramendëse prej 60 miliardë dollarësh. Kjo blerje vjen në një moment kyç për SpaceX, menjëherë pas listimit të saj të suksesshëm në bursën Nasdaq të Nju Jorkut.
Marrëveshja parashikon që Anysphere, e cila është themeluese e agjentit të kodimit me inteligjencë artificiale Cursor, të kalojë nën pronësinë e SpaceX. Bashkëpunimi mes dy kompanive kishte nisur që në muajin prill, kur SpaceX kishte të drejtën ta blinte startup-in për këtë shifër ose të paguante 10 miliardë dollarë për punën e përbashkët të kryer deri atëherë.
Kjo blerje synon të fuqizojë ndjeshëm degën e inteligjencës artificiale të SpaceX, xAI, e cila tashmë qëndron pas chatbot-it Grok. Tekonologjia e Cursor, ashtu si ajo e gjigantëve të tjerë si OpenAI dhe Anthropic, shfrytëzon inteligjencën artificiale për të automatizuar procesin e shkrimit të kodit, një ndër aplikimet më të spikatura dhe premtuese të IA-së aktualisht.
Listimi i fundit i SpaceX në Nasdaq e vlerësoi kompaninë në më shumë se 2 trilion dollarë, duke grumbulluar gjithashtu 85.7 miliardë dollarë kapital. Aksionet e kompanisë kanë shënuar një rritje prej pothuajse 50% nga çmimi fillestar i ofertës prej 135 dollarësh, duke dëshmuar një performancë të fortë në tregjet publike që në ditën e parë.
Sipas njoftimit të SpaceX, marrëveshja pritet të finalizohet deri në fund të shtatorit. Aksionarët e Cursor do të kompensohen me aksione të SpaceX në vlerë të plotë prej 60 miliardë dollarësh.
Vlerësimi stratosferik i SpaceX bazohet kryesisht në optimizmin rreth fitimeve të saj të mundshme në të ardhmen, më tepër sesa në rezultatet financiare të demonstruara deri më tani. Megjithatë, listimi në bursë shënoi gjithashtu një moment historik, duke e bërë Elon Musk-un trilionerin e parë në botë, një fakt që nxiti debate të gjera mbi pabarazinë ekonomike dhe taksat mbi pasurinë globale.