Ministri Gogu në Këshillin e Europës: Lufta kundër krimit të organizuar kërkon ndjekjen e parave të pista
Strasburg, Francë – Ministri i Drejtësisë, Toni Gogu, theksoi rëndësinë thelbësore të kthimit të informacionit financiar në hetime efektive, ndjekje penale dhe konfiskim pasurish, gjatë pjesëmarrjes së tij në Takimin Joformal të Ministrave të Drejtësisë të Këshillit të Europës. Nga Strasburgu, Gogu e përkufizoi këtë proces si dëshminë reale të efikasitetit të shtetit të së drejtës.
Ministri shqiptar mori pjesë në panelin dedikuar rolit të informacionit financiar në përpjekjet kundër pastrimit të parave dhe krimit financiar. Në ndërhyrjen e tij, ai nënvizoi se sfida kryesore për shtetet europiane sot nuk është thjesht mbledhja e të dhënave financiare, por transformimi i tyre në veprime konkrete gjyqësore, duke përfshirë procedime penale, konfiskime dhe rikuperim të pasurive të përfituara në mënyrë kriminale.
Sipas Gogu, çështja thelbësore është nëse informacioni i mbledhur mund të kthehet në veprim juridik përpara se fitimi kriminal të shndërrohet në pushtet kriminal, duke vënë theksin te shpejtësia dhe efektiviteti i reagimit të institucioneve.
Duke sjellë në vëmendje progresin e Shqipërisë në këtë fushë, Ministri Gogu theksoi se numri i procedimeve për pastrim parash të regjistruara nga Struktura e Posaçme Kundër Korrupsionit dhe Krimit të Organizuar (SPAK) është trefishuar gjatë viteve të fundit. Ai shtoi se hetimet financiare kanë rezultuar në sekuestrimin dhe konfiskimin e aseteve me një vlerë totale prej mbi 45 milionë eurosh, duke përfshirë edhe kripto-asete.
Gogu po ashtu vuri në dukje rëndësinë e bashkëpunimit ndërkombëtar, duke argumentuar se krimi financiar është thellësisht ndërkombëtar në natyrë dhe kërkon institucione që të bashkëpunojnë me të njëjtën shpejtësi dhe koordinim si rrjetet kriminale. Ky takim vjen në kuadër të përpjekjeve të vazhdueshme të Këshillit të Europës për forcimin e luftës globale kundër pastrimit të parave, financimit të terrorizmit dhe krimit të organizuar.