Ziadin Sela: Parlamenti Evropian thekson qartë, provimet shtetërore duhet të jenë edhe në gjuhën shqipe
Kryetari i Lidhjes Shqiptare, Ziadin Sela, ka reaguar lidhur me miratimin e raportit të Parlamentit Evropian për Maqedoninë e Veriut, ku është përfshirë edhe një amendament i rëndësishëm që parashikon mundësinë e dhënies së provimit të jurisprudencës në gjuhën shqipe. Sela theksoi se ky zhvillim dëshmon një qëndrim të prerë të institucionit evropian në favor të të drejtave gjuhësore.
Nëpërmjet një deklarate të plotë, Ziadin Sela nënvizoi se Parlamenti Evropian e ka bërë të qartë se provimet shtetërore duhet të mbahen në gjuhën shqipe, pa kërkuar hartimin e ligjeve të reja, metodologjive apo rregulloreve specifike. Ai shtoi se ky imperativ nuk duhet të kufizohet vetëm tek jurisprudenca, por të shtrihet në të gjitha provimet shtetërore.
“Kur je në tokën e gjuhës tënde, në gjuhën e pragjeve tona dhe në të drejtën e gjuhës së të parëve tuaj, por mbi të gjitha kur e do gjuhën dhe kombin që të përket, je i vendosur deri në fund dhe nuk heq dorë nga ajo çka je, s’ka se si të ndodhë ndryshe,” u shpreh Sela, duke theksuar lidhjen thelbësore me identitetin gjuhësor dhe kombëtar.
Lideri i Lidhjes Shqiptare kritikoi ashpër edhe Qeverinë aktuale, duke argumentuar se ajo po synon të minojë Marrëveshjen e Ohrit jo vetëm në aspektin gjuhësor, por edhe në shtyllën tjetër të saj, atë të përfaqësimit të drejtë dhe adekuat. Ai kërkoi respektimin e plotë të Marrëveshjes së Ohrit, si në letra ashtu edhe në frymën e saj.
Sela përgëzoi gjithashtu studentët për arritjen e tyre, duke theksuar se Parlamenti Evropian e konfirmoi se protestat studentore nuk janë destabilizuese apo të politizuara. Sipas tij, ky është një mesazh i qartë se kërkesat për të drejta gjuhësore janë legjitime.
Në fund të reagimit të tij, Ziadin Sela bëri thirrje për vazhdimin e betejës për të drejtat gjuhësore, duke theksuar se ajo duhet të jetë e vendosur dhe pa kompromise, derisa gjuha shqipe të arrijë barazinë e plotë kushtetuese me gjuhën maqedonase. “Respekte, djem dhe vajza!” përfundoi ai, duke shprehur mirënjohje për angazhimin e të rinjve.