Spanja regjistron mbi 5,200 viktima nga temperaturat e larta, shifra më e lartë që nga viti 2015
Spanja ka shënuar një numër rekord fatalitetesh të lidhura me temperaturat e larta, me gjithsej 5,232 vdekje të regjistruara që nga data 15 maj e këtij viti. Kjo shifër përfaqëson totalin më të lartë që prej nisjes së sistemit të Monitorimit të Vdekshmërisë Ditore (MoMo) në vitin 2015.
Të dhënat paraprake, të publikuara të hënën, tregojnë se një pjesë e konsiderueshme e këtyre vdekjeve, plot 2,147, janë regjistruar vetëm gjatë muajit gusht.
Sistemi MoMo, i menaxhuar nga Instituti Shëndetësor Carlos III (ISCIII), përdor modele statistikore për të vlerësuar ndikimin e temperaturave të larta në vdekshmëri. Ai nuk kufizohet vetëm në rastet ku nxehtësia është përcaktuar zyrtarisht si shkak individual i vdekjes, por bazohet në të dhënat e përgjithshme të vdekshmërisë dhe korrelacionin me ndikimin e temperaturës për të nxjerrë këto vlerësime.
Shifra aktuale ka tejkaluar ndjeshëm rekordet e viteve të mëparshme. Për krahasim, në vitin 2022 u regjistruan 4,789 vdekje të lidhura me nxehtësinë, ndërsa në vitin 2023 ky numër ishte 3,035.
Të dhënat e publikuara mbulojnë periudhën që nga 15 maji, datë kur çdo vit aktivizohet plani kombëtar i Spanjës për mbrojtjen e shëndetit publik nga efektet e temperaturave ekstreme.