Operacion i Gjerë Antidrogë në Krujë: Asgjësohen Fidanë dhe Bimë Kanabisi, Kontrollet Vijojnë
Qindra forca policore nga Drejtoria Vendore e Policisë Tiranë dhe Komisariati i Policisë Krujë, në bashkëpunim me Forcën Kombëtare të Sigurisë, Njësia Tiranë, kanë nisur prej orëve të para të mëngjesit të së martës një operacion të gjerë antidrogë në territorin e rrethit të Krujës. Ky aksion masiv ka si objektiv parandalimin dhe goditjen e kultivimit të bimëve narkotike në zonë.
Gjatë ditës së sotme, operacioni është përqendruar në fshatrat e njësisë administrative Cudhi, ku janë zbuluar dhe asgjësuar me djegie një numër i konsiderueshëm fidanësh dhe bimësh të kultivuara kanabisi. Për të rritur efektivitetin e kontrolleve, policia po përdor edhe dronë të teknologjisë së lartë.
Burime nga policia bëjnë me dije se operacioni do të zgjerohet dhe do të vijojë në ditët në vijim, duke shtrirë kontrollet edhe në territorin e fshatrave të njësive të tjera administrative të rrethit Krujë.
Krahas parcelave të hapura, shërbimet policore kanë intensifikuar punën edhe për kontrollin e ambienteve të mbyllura, ku dyshohet se mund të kryhet kultivimi i kanabisit duke përdorur llamba. Në këtë drejtim, Drejtoria Vendore e Policisë Tiranë dhe Komisariati i Policisë Krujë po bashkëpunojnë me OSHEE-në për të evidentuar zonat me rrezikshmëri të lartë për kultivim të brendshëm.
Paralelisht, grupe të posaçme hetimore, nën drejtimin e Prokurorisë, po kryejnë veprime konkrete në terren me qëllim identifikimin dhe kapjen e autorëve të përfshirë në këtë veprimtari kriminale.
Drejtoria Vendore e Policisë Tiranë lëshon një apel për të gjithë banorët e njësive administrative të rrethit Krujë, duke i paralajmëruar që të mos tentojnë të kultivojnë bimë narkotike. Policia është e vendosur të godasë çdo rast të tentativës për kultivim dhe të vërë para drejtësisë të gjithë personat që merren me këtë aktivitet kriminal.