Ministrat në Krujë, apel urgjent banorëve: Evakuohuni nga zonat e rrezikut, jeta është prioritet
Krujë – Situata e rëndë e krijuar nga zjarri masiv në Malin e Krujës ka shtyrë autoritetet të marrin masa ekstreme, duke përfshirë evakuimin e banorëve. Ministri i Mbrojtjes, Ermal Nufi, dhe Ministri i Punëve të Brendshme, Besfort Lamallari, ndodhen personalisht në zonë, ku po ndjekin nga afër zhvillimet dhe koordinimin e operacionit për shuarjen e flakëve dhe mbrojtjen e jetës së qytetarëve.
Në një mesazh të përbashkët drejtuar publikut, dy ministrat kanë theksuar nevojën thelbësore për bashkëpunim të ngushtë mes banorëve dhe Forcave të Armatosura e Policisë së Shtetit, sidomos gjatë procesit kritik të evakuimit nga zonat e prekura direkt nga zjarri.
Ministri Lamallari iu drejtua drejtpërdrejt banorëve me një apel të fortë, duke u kërkuar të largohen pa hezitim nga banesat e rrezikuara. Ai theksoi se bashkëpunimi me Policinë e Shtetit për evakuim është thelbësor, veçanërisht për shtëpitë afër vatrave të zjarrit në Malin e Krujës. “E kuptojmë që pasuria, prona e bërë me shumë mund e me kursimet tuaja të gjithë jetës janë të shtrenjta,” tha Lamallari, “por nuk ka gjë më të shtrenjtë se sa vetë jeta. Ju lutem bashkëpunoni me forcat e policisë, evakuohuni menjëherë nga banesat tuaja. Kjo është për jetën tuaj, për jetën e familjarëve tuaj dhe për jetën e oficerëve të policisë të cilët duan më të mirën për ju dhe familjarët tuaj.”
Edhe Ministri i Mbrojtjes, Ermal Nufi, ka nënvizuar se mbrojtja e jetës njerëzore është prioriteti absolut në këtë situatë emergjence. “Thirrja jonë është vetëm për ju,” deklaroi Nufi. Ai kërkoi bashkëpunim me policinë dhe Forcat e Armatosura për evakuimin nga banesat, duke siguruar se autoritetet kanë marrë çdo masë për të frenuar përhapjen e flakëve. “Jeta juaj është prioritet, jeta e çdo qytetari është prioritet. Ju lutem dëgjoni thirrjet e Forcave të Armatosura dhe të Policisë së Shtetit për evakuimin nga banesat, ndërkohë që ne jemi këtu duke luftuar dhe mitiguruar çdo kohë këtë zjarr masiv që është përhapur në Malin e Krujës,” theksoi ai.
Më herët gjatë ditës, autoritetet kanë urdhëruar evakuimin e menjëhershëm të banorëve në zonat e Barabit dhe Llubanit, pjesë e Bashkisë Krujë, për shkak të rrezikshmërisë së lartë që paraqet zjarri. Operacioni i gjerë po koordinohet nga Agjencia Kombëtare e Mbrojtjes Civile, Prefektura e Qarkut Durrës dhe strukturat e Emergjencave Civile të Bashkisë Krujë. Në terren janë angazhuar zjarrfikës, efektivë të Policisë së Shtetit dhe Forcave të Armatosura, të cilët po punojnë pa ndërprerje për t’i bërë ballë situatës kritike.