Lorik Cana, i trishtuar nga glorifikimi i kriminelëve të luftës: Serbia jeton në të kaluarën e saj të trazuar
Ish-kapiteni i Kombëtares së Shqipërisë, Lorik Cana, ka shprehur zhgënjimin e tij të thellë përmes një postimi në Instagram, duke komentuar një fotografi që, sipas tij, pasqyron mënyrën e gabuar se si brezat e rinj po përballen me historinë dhe marrëdhëniet ndërmjet popujve në rajon.
Cana deklaroi se imazhi i vajzës në fotografi e kishte bërë “thellësisht të trishtuar”. Ai theksoi rëndësinë që brezat e rinj të jenë bartës të shpresës, perspektivës dhe të ndërtojnë një të ardhme të përbashkët e paqësore, me lidhje të sinqerta mes kombeve.
Më tej, legjenda e futbollit shqiptar theksoi se shumë të rinj nuk e kanë përjetuar drejtpërdrejt luftën e vitit 1992. Megjithatë, sipas Canës, ata janë edukuar të trashëgojnë urrejtjen dhe të interpretojnë në mënyrë të gabuar figurat historike. Ai e cilësoi të papranueshme glorifikimin e një krimineli të dënuar për gjenocid si Ratko Mlladiç, përgjegjës për krime makabre kundër njerëzimit që nga Lufta e Dytë Botërore, duke e portretizuar atë si patriot dhe duke e quajtur dënimin e tij një fyerje ndaj kombit.
Në përfundim të reagimit të tij, Cana bëri thirrje për reflektim dhe ndryshim. Ai nënvizoi se çdo komb ka detyrat e tij për të mësuar nga e kaluara dhe për të ndërtuar një të ardhme më të mirë për brezat që vijnë. Megjithatë, ish-kapiteni kuqezi theksoi se Serbia vazhdon të jetojë në të kaluarën e saj të trazuar, duke dështuar të reflektojë dhe të ndryshojë politikat e saj.