FSHF miraton ndryshime thelbësore në formatin e “Abissnet Superiore”, detajohet skema e re
Komiteti Ekzekutiv i Federatës Shqiptare të Futbollit (FSHF) ka zhvilluar mbledhjen e radhës në “Shtëpinë e Futbollit”, ku ndër çështjet kryesore të diskutuara dhe miratuara ishin ndryshimet në rregulloret e garave dhe formatet e kampionateve. Vendimi më i rëndësishëm i marrë është ai për riorganizimin e formatit të kampionatit “Abissnet Superiore”, i cili synon rritjen e konkurrueshmërisë, ruajtjen e interesit sportiv gjatë gjithë sezonit dhe përmirësimin e përgatitjes së klubeve shqiptare për kompeticionet europiane.
Këto ndryshime do të hyjnë në fuqi duke nisur nga sezoni 2026/2027, duke shënuar një epokë të re për futbollin elitar shqiptar. Formati aktual me katër faza të rregullta, 36 javë dhe “Final 4” do t’i lërë vendin një strukture të re dhe më dinamike.
Skema e re për sezonin 2026/2027:
Nga sezoni 2026/2027, kampionati do të zhvillohet me tre faza të rregullta, duke përfshirë gjithsej 27 javë. Pas përfundimit të kësaj faze, skuadrat do të ndahen në dy grupe bazuar në renditjen e tyre. Një detaj kyç është përgjysmimi i pikëve të grumbulluara gjatë fazës së rregullt përpara nisjes së fazave play-off dhe play-out.
- Faza Play-off: Gjashtë skuadrat e renditura në krye të tabelës do të kualifikohen në fazën play-off. Ato do të luajnë ndeshje me sistem vajtje-ardhje, në një total prej 10 javësh garë. Skuadra që do të renditet e para në fund të kësaj faze do të shpallet kampione e edicionit 2026/2027.
- Faza Play-out: Katër skuadrat e renditura në fund të tabelës (nga vendi i 7-të deri në të 10-in) do të marrin pjesë në fazën play-out. Edhe këtu ndeshjet do të zhvillohen me sistem vajtje-ardhje, në një total prej 9 javësh garë. Skuadra e fundit në renditje do të bjerë automatikisht në Kategorinë e Parë.
Ngjitja dhe rënia mes kategorive:
Për sa i përket promovimit nga Kategoria e Parë, dy vendet e para do të ngjiten direkt në “Abissnet Superiore”. Ndërkohë, ekipet e renditura nga vendi i 3-të deri në të 6-in në Kategorinë e Parë do të zhvillojnë play-off-e për ngjitje, sipas skemës 3 vs 6 dhe 4 vs 5. Fituesit e këtyre dy çifteve përballen në finale, dhe skuadra fituese ngjitet në “Abissnet Superiore”. Humbësja e finales do të ketë një shans të dytë, duke u përballur me skuadrën e parafundit të play-out-it të Superiores për një vend në elitë.
Zgjerimi i Superiores nga sezoni 2027/2028:
Një tjetër ndryshim i rëndësishëm, i planifikuar për sezonin 2027/2028, është zgjerimi i “Abissnet Superiore” nga 10 në 12 skuadra. Kampionati do të zhvillohet në dy faza të rregullta me gjithsej 22 javë garë.
Pas përfundimit të këtyre dy fazave, skuadrat do të ndahen sërish në dy grupe sipas renditjes, dhe pikët do të përgjysmohen përpara nisjes së fazave play-off dhe play-out. Gjashtë skuadrat e para do të garojnë për titullin në fazën play-off, ndërsa gjashtë të tjerat në play-out.
- Rënia nga kategoria: Dy skuadrat e fundit në play-out do të bien direkt në Kategorinë e Parë. Skuadra e renditur e treta nga fundi do të luajë një ndeshje play-off për qëndrimin në kategori ndaj fituesit të fazës play-off të Kategorisë së Parë.
Këto ndryshime synojnë të sjellin një frymë të re në futbollin shqiptar, duke shtuar emocionet dhe betejën për çdo pikë, si në krye ashtu edhe në fund të tabelës.