Tiranë: Kanos taksistin me mjet prerës dhe e grabit, autori shoqërohet në polici
Policia e Tiranës ka shoqëruar pasditen e sotme një person, i cili dyshohet se ka kanosur me mjet prerës drejtuesin e një taksie dhe i ka grabitur atij para si dhe një varëse. Ngjarja ka ndodhur rreth orës 14:30, në aksin rrugor Tiranë-Elbasan.
Sipas informacioneve paraprake nga blutë e kryeqytetit, i dyshuari, ndërsa po udhëtonte me taksinë, në një moment ka nxjerrë mjetin prerës dhe ka kërcënuar shoferin, duke i marrë një sasi parash dhe një varëse që ai posedonte.
Falë reagimit të shpejtë të shërbimeve policore, autori i dyshuar u lokalizua menjëherë pas ngjarjes. Ai u neutralizua dhe aktualisht po shoqërohet në ambientet e Policisë së Tiranës për veprime të mëtejshme procedurale. Policia ka njoftuar se do të ketë një njoftim të plotë në përfundim të këtyre veprimeve.