Harry Kane dëshiron të dijë paraprakisht nëse ka fituar Topin e Artë: “Shumë stresuese për familjen”
Futbollisti anglez, Harry Kane, ka shprehur dëshirën për të mësuar paraprakisht nëse do të jetë fitues i çmimit prestigjioz “Topi i Artë”. Sipas sulmuesit të Bayernit, pasiguria dhe pyetjet e vazhdueshme po shkaktojnë shpërqendrim dhe stres të madh te familja e tij.
Në një deklaratë, Kane theksoi se presioni nuk është vetëm mbi të. “Mendoj se gruaja ime do të preferonte ta dinte dhe familja ime… është shumë stresuese për të gjithë”, u shpreh ai kur u pyet nëse do të dëshironte të informohej para ceremonisë zyrtare. Ai shtoi se personalisht do të preferonte të dinte rezultatin “që thjesht ta shihja dhe të mos më duhej të presja gjithë natën”, megjithëse pranon se ky është vendim i organizatorëve dhe nuk mund ta kontrollojë.
Sulmuesi 33-vjeçar tha se përpiqet të mos mendojë për këtë situatë, edhe pse e pranon që është e vështirë, duke pasur parasysh thashethemet dhe gjërat që qarkullojnë rreth çmimit. Ai është konsideruar favoriti kryesor për të fituar Topin e Artë, falë një performance të shkëlqyer. Këtë sezon, Kane ka shënuar 10 gola për Bayernin dhe 6 për Kombëtaren e Anglisë. Së fundmi, ai shënoi nga penalltia në barazimin 2-2 të Ligës së Kampionëve kundër Arsenalit, ku shquhet edhe për asistin perfekt që i mundësoi Alphonso Davies të shënonte golin e barazimit 1-1.
Ndër pretendentët e tjerë për çmimin prestigjioz janë Lamine Yamal i Barcelonës, i cili renditet si favoriti i dytë, dhe Kylian Mbappé i Real Madridit, i cili është gjithashtu në listën e shkurtër.