Zërat e Rinj të PS-së Reagojnë pas Vendimit të Koçekut: Dorëzo Mandatin
Vendimi i deputetes Marjana Koçeku për t’u larguar nga grupi parlamentar i Partisë Socialiste dhe për të vijuar aktivitetin e saj si deputete e pavarur, ka sjellë reagime të menjëhershme nga përfaqësues të brezit të ri socialist.
Mes të parëve që reagoi ishte studentja Helena Kaçe, e cila u bë e njohur në opinionin publik pasi hapi Kongresin e Partisë Socialiste, ku u vlerësua nga Kryeministri Edi Rama si një prej figurave që përfaqësojnë brezin e ri të partisë. Në një postim në rrjetet sociale, Kaçe e konsideroi vendimin e Koçekut si një akt të papajtueshëm me mandatin e marrë nën siglën e PS-së. Ajo theksoi se “pavarësia e vërtetë nuk nis duke dorëzuar teserën e duke mbajtur karrigen. Nis duke dorëzuar mandatin. Nëse idealet e tua nuk përkojnë më me atë shtëpi politike, hapi më parimor është t’ua kthesh mandatin atyre që të besuan”, shkroi Kaçe, duke i uruar njëkohësisht suksese Koçekut në rrugëtimin e saj të ri politik si e pavarur.
Një qëndrim të ngjashëm mbajti edhe Alfred Muharremi, një tjetër përfaqësues i brezit të ri të socialistëve. Muharremi, ndërsa vlerësoi të drejtën e Koçekut për të ndjekur një kauzë tjetër politike, ngriti pikëpyetje mbi kohën e këtij vendimi. Sipas tij, kauzat që deputetja deklaron se po përfaqëson sot kanë qenë të njohura edhe më herët, ndërsa ajo ka pasur mundësinë t’i artikulojë dhe mbrojë ato nga foltorja e Kuvendit. “Nëse beson se nuk përfaqëson më Partinë Socialiste, atëherë akti politik nuk mbaron te dorëzimi i teserës, por te dorëzimi i mandatit”, shkruajti ai. Muharremi shtoi se mandati është një besim i dhënë nga qytetarët dhe nga forca politike nën siglën e së cilës është fituar, ndaj sipas tij, largimi nga Partia Socialiste duhet të shoqërohet edhe me heqjen dorë nga mandati parlamentar.
Marjana Koçeku njoftoi ditën e diel largimin e saj nga grupi parlamentar i Partisë Socialiste, duke shpallur vijimin e aktivitetit politik si deputete e pavarur. Ky vendim ka ndezur menjëherë një debat të fortë brenda kampit socialist, veçanërisht lidhur me etikën dhe parimet e përfaqësimit politik në Kuvend.