Incident pranë Ambasadës së Izraelit në Tiranë: Vajzë e Maskuar Heq Flamurin, MEPJ Dënon Fort Aktin
Tirana u bë dje dëshmitare e një incidenti pranë Ambasadës së Shtetit të Izraelit, ku një vajzë e maskuar shkuli flamurin e këtij shteti. Ngjarja ndodhi gjatë zhvillimit të protestës së 21-të në kryeqytet, dhe pamjet e saj janë bërë tashmë publike.
Ky akt ka ngjallur reagimin e menjëhershëm të Ministrisë për Evropën dhe Punët e Jashtme (MEPJ), e cila e ka dënuar me forcë veprimin. Sipas pamjeve të transmetuara, vajza, e identifikuar me maskë, shihet duke hequr flamurin izraelit nga ambasada.
Në një njoftim zyrtar, Ministria theksoi se “dënon me forcë heqjen dhe përdhosjen e flamurit të Ambasadës së Shtetit të Izraelit në Tiranë nga protestues të maskuar gjatë protestës së mbrëmshme”. MEPJ u shpreh se veprime të tilla “nuk kanë asnjë lidhje me lirinë e shprehjes apo të drejtën për protestë paqësore, por përbëjnë shfaqje të urrejtjes dhe intolerancës”.
Më tej, në deklaratën e saj, MEPJ argumentoi se këto veprime janë të papajtueshme me vlerat demokratike dhe standardet evropiane, si dhe me parimet e respektit dhe bashkëjetesës që karakterizojnë shoqërinë shqiptare. “Veprime të tilla janë shfaqje të urrejtjes dhe nxitjes së saj dhe janë krejtësisht të papajtueshme me parimet e respektit dhe bashkëjetesës që Shqipëria i ka në themel”, thuhet në reagimin e Ministrisë, duke theksuar angazhimin e vendit ndaj këtyre parimeve thelbësore.