Rrjet Dezinformues në YouTube: Aktorë të Paguar dhe Inteligjencë Artificiale Shfrytëzojnë Debatet Politike në SHBA
Një hetim i thelluar nga media amerikane “Semafor” ka nxjerrë në dritë ekzistencën e një rrjeti të gjerë kanalesh në YouTube, të cilat kanë grumbulluar miliona shikime duke përdorur aktorë të paguar për të lexuar skenarë politikë, pjesërisht ose tërësisht të krijuar me inteligjencë artificiale. Kjo praktikë po shfrytëzon debatet politike në Shtetet e Bashkuara, duke maskuar propagandën si raportime të pavarura nga qytetarë të thjeshtë.
Zbulimi tregon se videot, të cilat ndjekin një formulë të ngjashme, shfaqnin tituj të ekzagjeruar, pretendime mashtruese dhe informacione të rreme. Përmbajtja e tyre kishte si objektiv kryesor politikanët demokratë, mes të cilëve kryebashkiakun e Nju Jorkut, Zohran Mamdani, guvernatorin e Kalifornisë, Gavin Newsom, dhe guvernatorin e Illinoisit, JB Pritzker.
Sipas të dhënave nga organizata “Riddance AI”, rreth 12 kanale të lidhura me këtë rrjet kanë gjeneruar mbi 45 milionë shikime dhe më shumë se 90 mijë komente në YouTube, përveç miliona shfaqjeve të tjera në platformën TikTok. Një aspekt shqetësues i kësaj strategjie ishte përdorimi i njerëzve realë në vend të prezantuesve virtualë, duke e bërë shumë më të vështirë për audiencën të identifikonte se bëhej fjalë për përmbajtje të krijuar ose të manipuluar nga inteligjenca artificiale.
Personazhe të njohura në këto video, të tilla si “William” dhe “Omar”, u zbuluan se ishin aktorë dhe zëdhënës me pagesë, të cilët thjesht lexonin skenarë të ngjashëm përpara kamerës. Njëri prej aktorëve të intervistuar konfirmoi se paguhej për realizimin e videove, por deklaroi se nuk kishte dijeni për identitetin e financuesit, pasi komunikimi bëhej nëpërmjet një ndërmjetësi.
Kjo praktikë lidhet me kompaninë “Virelox”, e cila në njoftimet e saj për punë kërkonte prezantues për të regjistruar shpejt materiale të stilit të lajmeve, me oferta pagese deri në 26 dollarë për video. Ky model operimi, i njohur si “krijues fantazmë”, përdorte inteligjencën artificiale, aktorët e lirë dhe një prodhim me kosto të ulët për të publikuar një sasi të madhe videosh.
Themeluesi i “Virelox”, Caleb Chan, kishte deklaruar më parë në rrjetet sociale se rrjeti i tij përfshinte më shumë se 500 “krijues fantazmë” dhe gjeneronte miliarda shikime çdo muaj. Ai pretendonte gjithashtu se publikimi i së njëjtës etiketë nga 26 llogari brenda dhjetë minutash mund të bënte që algoritmi i YouTube ta trajtonte përmbajtjen si “lajm të fundit” dhe ta promovonte atë gjerësisht.
Megjithatë, “Virelox” ka mohuar se prodhonte materiale për fushata politike, komitete financimi ose organizata ideologjike. Kompania ka deklaruar gjithashtu se nuk përdorte prezantues sintetikë apo robotë automatikë, duke theksuar se angazhonte vetëm njerëz realë.