Karamuço: Dëshmitarë në Gjykatën Speciale, spiunë të BIA-s serbe
Eksperti i kriminalistikës, Ervin Karamuço, ka lëshuar një deklaratë të fortë gjatë emisionit “Now me Erla Mëhillin”, duke pretenduar se dëshmitarë kyç në Gjykatën Speciale të Hagës kundër ish-krerëve të Ushtrisë Çlirimtare të Kosovës kanë qenë në fakt spiunë të shërbimit sekret serb, BIA. Kjo deklaratë vjen pas vendimit të Gjykatës Speciale për dënimin e ish-liderëve të UÇK-së.
Karamuço theksoi se, ndërsa vëmendja e politikës shqiptare ishte përqendruar në çështje të përditshme, Serbia në bashkëpunim me Rusinë kanë zhvilluar prej vitesh një strategji të mirëpërcaktuar dhe afatgjatë. Sipas tij, Beogradi ka punuar me intensitet për mbledhjen dhe dërgimin e dokumenteve dhe informacioneve të ndryshme drejt institucioneve ndërkombëtare të drejtësisë.
“Kur ne merreshim me gjëra banale, politika e ditës, serbët bashkë me rusët bënin strategji të madhe. Dhe shiko ku jemi ne sot. Tani që u zgjuam, jemi shumë vonë. Ata janë në avantazh,” citoi Karamuço, duke nënvizuar se kjo strategji e ka lejuar Serbinë të “hedhë një njollë të madhe” që kërkon shumë punë për t’u pastruar.
Eksperti shpjegoi më tej se një pjesë e konsiderueshme e këtyre dëshmitarëve, të cilët kanë ofruar informacione në Hagë, kanë qenë pjesë e formacioneve që gjatë luftës në Kosovë dërgonin të dhëna në Serbi. “Nuk e dimë sa spiunë janë nxitur, megjithëse kanë qenë pjesë e formacioneve që çonin informacione në Serbi kur bëhej lufta dhe një pjesë e këtij kontingjenti rezultojnë sot si dëshmitarë në Hagë,” deklaroi ai. Karamuço theksoi se këta individë i kanë qëndruar konsistentisht detyrës që kishin marrë nga BIA serbe, duke rezultuar në atë që ai e cilësoi si “dëmin e madh” me “katër çlirimtarë prapa hekurave.”