Zhvillime të Reja në Greqi: Gjendet Makina me Kallashnikov pas Arratisjes Spektakolare të Gentian Çipit
Autoritetet greke kanë shënuar një përparim në hetimin e arratisjes së spektakolare të të burgosurit shqiptar Gentian Çipi. Një nga dy automjetet e dyshuara si të përdorura gjatë largimit të 40-vjeçarit nga spitali i Serres është gjetur, ndërsa brenda tij janë zbuluar një kallashnikov dhe municione.
Mjeti i parë u identifikua pak larg spitalit ku ndodhi ngjarja, i përplasur në një rrugë me dhe, në zonën e unazës së Serres. Brenda tij, mediat greke raportojnë se u gjetën një pushkë automatike e tipit kallashnikov dhe fishekë të shumtë, duke konfirmuar natyrën e armatosur të operacionit të arratisjes.
Ndërkohë, një automjet tjetër, i gjetur plotësisht i djegur në zonën e Volvës, po hetohet gjithashtu nga policia. Po shqyrtohet nëse ky është mjeti i dytë i përdorur nga bashkëpunëtorët e Çipit për t’u larguar nga vendi i ngjarjes.
Ngjarja e bujshme ndodhi pas orës 23:00, kur i burgosuri Gentian Çipi deklaroi se ndihej keq. Pas kësaj, ai u transferua në Spitalin e Serres për ekzaminime mjekësore. Këtu, sipas informacioneve paraprake, atë e prisnin bashkëpunëtorët e tij.
Detajet e arratisjes zbulojnë një plan të mirëmenduar: bashkëpunëtorët ishin veshur si oficerë policie dhe madje përdorën një makinë bujqësore me drita, duke simuluar një automjet të njësive OPKE, me qëllim që të mos bien në sy dhe të dukeshin si pjesë e forcave të rendit.
Transferimi i 40-vjeçarit nga burgu në spital ishte kryer nga rojet e jashtme të burgut. Burime policore kanë bërë të ditur se nuk ishte kërkuar ndihmë nga Policia Helenike për këtë transport, çka mund të ketë lehtësuar planin e arratisjes.
Gjatë aksionit, autorët arritën të sekuestrojnë një armë nga njëri prej rojeve të burgut. Më pas, ata morën me vete 40-vjeçarin dhe u larguan me shpejtësi nga spitali, duke zhdukur gjurmët.