Arrestohet 20-vjeçari në Shkodër, dyshohet për vjedhje serike dhe kapet me drogë
Policia e Shkodrës ka finalizuar operacionin e koduar “Recently”, duke vënë në pranga një 20-vjeçar, i cili dyshohet si autor i disa vjedhjeve të ndodhura në qytetin e Shkodrës dhe në Velipojë. Gjatë kontrollit në banesën e tij, efektivët e policisë kanë zbuluar dhe sekuestruar edhe një sasi lënde narkotike.
Në kuadër të këtij operacioni, u arrestua shtetasi me inicialet Xh. Rr., 20 vjeç, banues në fshatin Grudë e Re, Shkodër. Sipas informacioneve të siguruara nga Policia, veprimet hetimore kanë treguar se i riu, në bashkëpunim me një shtetas të mitur, dyshohet se ka kryer disa vjedhje në periudha të ndryshme kohore.
Këto vjedhje përfshijnë dy motomjete, një biçikletë elektrike, një celular, si dhe një shumë parash të marra nga një lokal. Pas hetimeve, shërbimet policore kanë arritur të gjejnë dhe sekuestrojnë dy motomjetet e dyshuara si të vjedhura, të cilat do të shërbejnë si provë materiale në procesin gjyqësor.
Gjatë kontrollit të ushtruar në banesën e 20-vjeçarit, forcat e rendit kanë zbuluar dhe sekuestruar një sasi lënde të dyshuar narkotike të llojit Cannabis sativa.
Hetimet janë duke vazhduar me intensitet për të dokumentuar plotësisht të gjitha rastet e tjera të vjedhjeve që mund të jenë kryer nga i arrestuari, si dhe për të identifikuar dhe përcaktuar përgjegjësinë penale të personave të tjerë të mundshëm të përfshirë në këtë veprimtari kriminale.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme ligjore.