Ministria e Shëndetësisë reagon pas zjarrit në Fier: Tre persona të asfiksuar nga tymi, ekipet shëndetësore në gatishmëri të plotë
Ministria e Shëndetësisë ka lëshuar një deklaratë zyrtare në lidhje me situatën e krijuar nga zjarri në Fier, duke konfirmuar se deri më tani tre persona janë paraqitur me shenja asfiksie nga tymi.
Këta tre individë kanë marrë menjëherë ndihmën e nevojshme mjekësore. Ndërkohë, ekipet shëndetësore mbeten të angazhuara në terren dhe në gatishmëri të plotë për t’iu përgjigjur çdo nevoje apo emergjence shëndetësore që mund të lindë.
Për menaxhimin e situatës në zonë, janë vënë në dispozicion 9 mjekë dhe infermierë të Qendrës Shëndetësore Levan. Gjithashtu, dy autoambulanca me personel shëndetësor nga Spitali Rajonal Fier janë mobilizuar; njëra prej tyre është stacionuar në Levan, ndërsa tjetra qëndron në gatishmëri për ndërhyrje sipas nevojës.
Për raste të mundshme të urgjencave kardiake, është siguruar koordinimi i nevojshëm me Spitalin Memorial Fier, me qëllim garantimin e një trajtimi të shpejtë dhe të specializuar.
Strukturat shëndetësore vazhdojnë të monitorojnë situatën pa ndërprerje dhe mbeten në vigjilencë të plotë për të ofruar mbështetjen mjekësore të nevojshme për të gjithë qytetarët e prekur.