Policia e Tiranës Parandalon Përleshjen e Armatosur mes Të Miturve, 28 Procedohen Pas Zënkave në TikTok
Policia e Tiranës ka ndërhyrë me sukses duke parandaluar një konflikt të mundshëm të dhunshëm mes disa grupeve të të miturve, të armatosur me armë të ftohta dhe mjete të mprehta. Ngjarja, e cila u regjistrua në zonën e Kombinatit, rezultoi në procedimin penal të 28 të miturve.
Përmes një njoftimi zyrtar, Policia bëri të ditur se shërbimet e Komisariatit të Policisë Nr. 6, në bashkëpunim me Forcën e Posaçme “Shqiponja”, morën informacion operativ mbi një përplasje të paralajmëruar. Menjëherë pas marrjes së këtij informacioni, u organizuan operacione për të ndërhyrë dhe parandaluar zhvillimin e konfliktit.
Shërbimet policore lokalizuan të miturit në rrugën “Llambi Bonata”, të ndarë në grupe, të cilët dyshohet se ishin gati për t’u përleshur. Ndërhyrja e menjëhershme e policisë bëri të mundur shoqërimin e tyre në ambientet e Komisariatit të Policisë Nr. 6. Gjatë kontrollit fizik, disa prej tyre u gjetën me thika, kaçavida dhe maska, të cilat u sekuestruan në cilësinë e provës materiale.
Burime pranë hetimit bëjnë me dije se ky grumbullim i organizuar i të miturve, me qëllim përleshjen, kishte ardhur si pasojë e zënkave dhe mosmarrëveshjeve të lindura në platformën sociale TikTok.
Veprimet procedurale me 28 të miturit, të moshave nga 13 deri në 17 vjeç, u kryen në praninë e prindërve të tyre dhe specialistëve psikologë. Pas komunikimit me prokurorin, nisi procedimi në gjendje të lirë për të gjithë shtetasit e mitur. Materialet e mbledhura i janë referuar Prokurorisë për veprime të mëtejshme ligjore.