Erlis Çela: Pas 24 ditësh protestë, PS dhe PD janë humbësit kryesorë politikë
Pedagogu Erlis Çela ka kryer një bilanc politik të protestës 24-ditore që po zhvillohet në Tiranë, duke argumentuar se qeveria shqiptare, e përfaqësuar nga Partia Socialiste, dhe Partia Demokratike, janë aktorët që kanë pësuar humbjet më të mëdha deri në këtë fazë të lëvizjes qytetare.
I ftuar në emisionin “Now” në Euronews Albania, Çela vuri në dukje se pas më shumë se tre javësh zhvillimi të protestës, debati publik duhet të fokusohet te pasojat konkrete politike dhe te identifikimi i subjekteve që kanë fituar apo humbur terren nga kjo lëvizje qytetare.
“Politikisht, pas 24 ditësh, pyetja që duhet të bëhet është kush ka humbur dhe kush ka fituar nga kjo protestë. Për mua, humbësit e mëdhenj janë qeveria dhe PD, por nuk jam i sigurt kush ka fituar më shumë”, deklaroi ai, duke theksuar se ndërsa humbësit janë të qartë, fituesit mbeten të paqartë.
Sipas Çelës, protesta ka hyrë në një fazë më të avancuar dhe të pjekur, ku vëmendja nuk është më e kufizuar vetëm te reagimi spontan i qytetarëve. Ai theksoi se fokusi tashmë po zhvendoset drejt analizës së alternativave politike dhe platformave që mund të përfaqësojnë dhe materializojnë kërkesat e protestuesve.
Ai shtoi se ndikimi i kësaj lëvizjeje po analizohet me kujdes edhe nga drejtuesit e partive të vogla në vend, të cilët po vlerësojnë se çfarë përfitimesh apo dëmesh mund t’u sjellë kjo situatë politike. “Tani po flasim për një lloj pjekurie të protestës, por flasim për emra, për platforma dhe në këtë moment edhe kryetarët e partive të vogla, si Shehaj, Qori dhe Lapaj, po e bëjnë këtë llogari: çfarë na ka sjellë kjo gjë?”, përfundoi Çela.