Rama pas vizitës në Paris: Shqipëria, partnere strategjike e Francës në Ballkan
Kryeministri Edi Rama ka deklaruar se projekti i rëndësishëm për “Rilindjen e Liceut Francez të Korçës” tashmë ka mbërritur në tryezën e Presidentit francez Emmanuel Macron, ku po ndiqet si një nismë nën kujdesin e tij. Kjo vjen pas vizitës së fundit të Ramës në Paris, e cila, sipas tij, ka forcuar ndjeshëm marrëdhëniet dypalëshe.
Gjatë qëndrimit në kryeqytetin francez, fokusi ishte tek thellimi i bashkëpunimit kulturor dhe arsimor mes Shqipërisë dhe Francës, si dhe avancimi i projekteve me rëndësi historike. Rama theksoi se vendosja e projektit të Liceut të Korçës direkt në agjendën e Presidentit Macron dëshmon për një nivel të ri angazhimi nga pala franceze.
Sipas kryeministrit shqiptar, një angazhim i tillë i drejtpërdrejtë i Francës ndaj Shqipërisë do të ishte i paimagjinueshëm vetëm një dekadë më parë. Kjo, tha ai, tregon për progresin e marrëdhënieve dhe pozicionimin e Shqipërisë si një partnere strategjike e Francës në rajonin e Ballkanit Perëndimor.