Shqipëria thellon lidhjet me BE: Heqja e tarifave roaming dhe investimet e One Albania
Shqipëria shënon progres të rëndësishëm drejt integrimit në Bashkimin Europian, me theks të veçantë në forcimin e urave përmes komunikimit, teknologjisë dhe infrastrukturës digjitale. Pak javë pasi Këshilli Europian miratoi nisjen e negociatave për eliminimin e tarifave roaming mes BE-së dhe vendeve të Ballkanit Perëndimor, operatori telefonik One Albania ka prezantuar vizionin dhe investimet e grupit hungarez 4iG. Këto investime synojnë të mbështesin këtë proces, duke ofruar shërbime dhe teknologji që afrojnë qytetarët shqiptarë me standardet dhe eksperiencën europiane të komunikimit.
Barna Kutvolgyi, CEO i One Albania, theksoi rolin udhëheqës të kompanisë në këtë drejtim. “One Albania është përpjekur të jetë në pararojë të këtij procesi. Kjo është arsyeja pse iu bashkuam marrëveshjes për heqjen e roaming në Ballkanin Perëndimor,” tha Kutvolgyi. Ai shtoi se One Albania është i vetmi operator në Shqipëri që i është bashkuar nismës për uljen e tarifave roaming data me 37 operatorë nga Ballkani Perëndimor dhe Bashkimi Europian. Më tej, Kutvolgyi theksoi hapin e fundit të rëndësishëm: “Muajin e fundit hodhëm një tjetër hap të rëndësishëm, duke prezantuar plane të reja gjithëpërfshirëse që përfshijnë roaming pa tarifa apo paketa shtesë, falë marrëveshjeve të lidhura me 87 operatorë në të gjithë kontinentin.”
Në këtë kontekst, Irena Malolli, Drejtoresha e Politikave dhe Strategjive të Zhvillimit të Telekomunikacionit dhe Postave në Ministrinë e Infrastrukturës dhe Energjisë, vuri në dukje rëndësinë e investimeve që nxisin progresin e Shqipërisë drejt anëtarësimit në BE. “Ministria e Infrastrukturës dhe Energjisë ka vendosur një urë bashkëpunimi dhe komunikimi të ngushtë me kompanitë e telekomunikacionit qysh herët, në mënyrë që të kemi rritjen e gatishmërisë dhe përgatitjes operacionale të kompanive,” deklaroi Malolli, duke nënvizuar bashkëpunimin strategjik midis sektorit publik dhe atij privat.
Më herët gjatë këtij muaji, One Albania prezantoi planet e reja të quajtura “One EU”, të cilat integrojnë shërbimin roaming direkt në planet mujore të abonentëve. Kjo u mundëson klientëve të përdorin internetin dhe të komunikojnë në vendet europiane në të njëjtat kushte si në Shqipëri, duke ofruar deri në 50 GB internet në roaming. Këto iniciativa dhe investimet në infrastrukturën digjitale dhe zhvillimin e shërbimeve jo vetëm që e bëjnë Europën më të aksesueshme për qytetarët shqiptarë, por njëkohësisht po e afrojnë Shqipërinë çdo ditë e më shumë me familjen europiane, duke forcuar integrimin e saj në tregun e përbashkët të komunikimeve.